കാസര്‍കോട്: പാതി വിലയ്ക്കു സ്‌കൂട്ടര്‍ വാഗ്ദാനം ചെയ്ത് കോടിക്കണക്കിനു രൂപ തട്ടിയെടുത്ത സംഭവത്തില്‍ കാസര്‍കോട് ജില്ലയിലെ ആദ്യത്തെ കേസ് ബദിയഡുക്ക പൊലീസ് രജിസ്റ്റര്‍ ചെയ്തു. മാര്‍പ്പിനടുക്ക മൈത്രി ലൈബ്രറി ആന്റ് റീഡിംഗ് റൂം പ്രസിഡണ്ട് കുംബഡാജെ, ഗുരിയടുക്കയിലെ പ്രസാദ് ഭണ്ഡാരി നല്‍കിയ പരാതി പ്രകാരം തൊടുപുഴയിലെ അനന്തകൃഷ്ണനെതിരെയാണ് കേസെടുത്തത്. 2024 മാര്‍ച്ച് 26 മുതല്‍ 72 പേരില്‍ നിന്നായി 30,59000 രൂപ തട്ടിയെടുത്തുവെന്ന പരാതിയിലാണ് കേസെടുത്തത്. 36 പേര്‍ക്ക് പകുതി വിലക്ക് സ്‌കൂട്ടറും 36 പേര്‍ക്ക് ലാപ് ടോപും നല്‍കാമെന്ന് വാഗ്ദാനം ചെയ്ത് ലൈബ്രറിയുടെ അക്കൗണ്ട് വഴി പണം തട്ടിയെടുത്തുവെന്നാണ് പ്രസാദ് ഭണ്ഡാരി നല്‍കിയ പരാതിയില്‍ പറയുന്നത്.
സമാനരീതിയിലുള്ള മറ്റൊരു പരാതി ഹൊസ്ദുര്‍ഗ് പൊലീസിലും ലഭിച്ചിട്ടുണ്ട്. മോനാച്ചയിലെ രാമകൃഷ്ണനാണ് പരാതി നല്‍കിയത്. അനന്തു കൃഷ്ണന്‍ കാസര്‍കോട് ജില്ലയില്‍ നാലു എന്‍ജിഒകള്‍ക്കാണ് പകുതി വിലക്ക് സ്‌കൂട്ടര്‍, ലാപ്‌ടോപ്പ്, തയ്യല്‍മെഷീന്‍ എന്നിവ വാഗ്ദാനം ചെയ്തിരുന്നത്. ഇതില്‍ രണ്ട് എന്‍ജിഒകള്‍ നല്‍കിയ ഓര്‍ഡര്‍ പ്രകാരമുള്ള ഓഫറുകള്‍ നല്‍കിയിരുന്നു.