അഹമ്മദാബാദ്: ഗുജറാത്തിലെ വാഹനാപകടത്തില്‍ മലയാളി ദമ്പതികള്‍ മരിച്ചു. ആലപ്പുഴ തുറവൂര്‍ സ്വദേശികളായ വാസുദേവന്‍, യാമിനി എന്നിവരാണ് മരിച്ചത്. ഇവര്‍ സഞ്ചരിച്ച കാറിന്റെ ഡ്രൈവറും അപകടത്തില്‍ മരിച്ചു. ദ്വാരക ക്ഷേത്ര ദര്‍ശനത്തിനായി എത്തിയതായിരുന്നു ഇവര്‍. ദ്വാരകയില്‍ എത്തിയ ശേഷം താമസിച്ചിരുന്ന ലോഡ്ജിലേക്കു ടാക്‌സി കാറില്‍ മടങ്ങവേ ട്രക്കുമായി കൂട്ടിയിടിക്കുകയായിരുന്നു. വാസുദേവന്‍ സംഭവ സ്ഥലത്തുവച്ചും യാമിനി ആശുപത്രിയില്‍ വച്ചുമാണ് മരിച്ചത്. ആശുപത്രിയിലേക്കുള്ള വഴിമധ്യേ ഡ്രൈവറും മരിച്ചു. വ്യാഴാഴ്ച നാട്ടിലേക്കു മടങ്ങാനിരിക്കെയാണു അപകടം. വിവരമറിഞ്ഞ് ബന്ധുക്കള്‍ നാട്ടില്‍നിന്നും പുറപ്പെട്ടിട്ടുണ്ട്.