ഇടുക്കി: ഓടിക്കൊണ്ടിരിക്കുന്ന കെഎസ്ആര്‍ടിസി ബസില്‍ നിന്നും തെറിച്ചുവീണ വീട്ടമ്മയ്ക്ക് ദാരുണാന്ത്യം.
ഉപ്പുതറ ചീന്തലാര്‍ സ്വദേശി സ്വര്‍ണ്ണമ്മയാണ് മരിച്ചത്. ചൊവ്വാഴ്ച രാവിലെ ഒമ്പതുമണിയോടെ മലയോര ഹൈവേയില്‍ കട്ടപ്പന-കുട്ടിക്കാനം റൂട്ടില്‍ ചിന്നാര്‍ നാലാം മൈലില്‍ വെച്ചാണ് സംഭവം. ബസില്‍ കയറി നൂറുമീറ്റര്‍ ചെന്നപ്പോള്‍ ഡോറിന് സമീപമുള്ള തൂണില്‍ പിടിച്ചുനില്‍ക്കുകയായിരുന്ന ഇവര്‍ വളവ് തിരിയുന്നതിനിടെ പിടിവിട്ട് ഡോറിലേക്കും തുടര്‍ന്ന് റോഡിലേക്കും വീഴുകയായിരുന്നു. ഗുരുതരമായി പരിക്കേറ്റ ഇവരെ ആദ്യം പീരുമേട് താലൂക്ക് ആശുപത്രിയിലും, പിന്നീട് കോട്ടയം മെഡിക്കല്‍ കോളേജ് ആശുപത്രിയിലും എത്തിച്ചെങ്കിലും ജീവന്‍ രക്ഷിക്കാനായില്ല. തലയ്ക്ക് ഉള്‍പ്പെടെ ഗുരുതരമായ മുറിവുണ്ടായിരുന്നു. അപകടകാരണം അന്വേഷിക്കാന്‍ നിര്‍ദേശം നല്‍കിയതായി കെഎസ്ആര്‍ടിസി അധികൃതര്‍ അറിയിച്ചു. പ്രാഥമികാന്വേഷണത്തില്‍ ഡോറിന്റെ ലോക്കിനും ചില പ്രശ്‌നങ്ങളുണ്ടെന്നാണ് വ്യക്തമായിട്ടുള്ളത്. ബസില്‍ കയറിയ ശേഷം ഡോറിന് സമീപത്ത് നിന്ന് മാറാന്‍ ശ്രമിക്കുന്നതിനിടയിലാണ് അപകടം.
