കണ്ണൂര്: എഡിഎം നവീന് ബാബുവിന്റെ മരണവുമായി ബന്ധപ്പെട്ട കേസില് പ്രതിയായ കണ്ണൂര് ജില്ലാ പഞ്ചായത്ത് മുന് പ്രസിഡന്റ് പിപി ദിവ്യ സമര്പ്പിച്ച മുന്കൂര് ജാമ്യാപേക്ഷ പരിഗണിക്കുന്നത് മാറ്റിവെച്ചു. മുന്കൂര് ജാമ്യാപേക്ഷയില് ഇന്ന് വാദം കേള്ക്കാനിരിക്കെയാണ് കോടതി മാറ്റിവെച്ചത്. 24ന് വ്യാഴാഴ്ചയായിരിക്കും ദിവ്യയുടെ ജാമ്യ ഹര്ജിയില് കോടതി വാദം കേള്ക്കുക.
കേസ് വ്യാഴാഴ്ച പരിഗണിക്കുമ്പോള് പൊലീസ് റെക്കോര്ഡുകളും ഹാജരാക്കണമെന്ന് കോടതി നിര്ദേശിച്ചു. നവീന് ബാബുവിന്റെ ഭാര്യ വക്കാലത്ത് ബോധിപ്പിച്ചു. ജോണ് റാല്ഫ്, പിഎം സജിത എന്നിവര് ഹാജരായി. ജാമ്യ ഹര്ജിക്കുള്ള ആക്ഷേപം ബോധിപ്പിക്കുന്നതിന് സമയം ആവശ്യപ്പെടുകയായിരുന്നു. അഡ്വ. കെ വിശ്വന് പി.പി ദിവ്യക്ക് വേണ്ടി ഹാജരായി. കോടതി മുന്കൂര് ജാമ്യം അനുവദിച്ചില്ലെങ്കില് അറസ്റ്റ് അടക്കമുള്ള നടപടികളിലേക്ക് പൊലീസ് കടക്കാനാണ് സാധ്യത. ജില്ലാ കളക്ടറാണ് തന്നെ പരിപാടിയിലേക്ക് ക്ഷണിച്ചതെന്ന് ദിവ്യ ഹര്ജിയില് ചൂണ്ടികാട്ടിയിട്ടുണ്ട്. പ്രസംഗത്തിന്റെ വീഡിയോ അടക്കം സമര്പ്പിച്ചുകൊണ്ടാണ് മുന്കൂര് ജാമ്യഹര്ജി സമര്പ്പിച്ചത്. അതേസമയം എഡിഎം നവീന് ബാബുവിന്റെ മരണം സംഭവിച്ച് ഏഴു ദിവസം പിന്നിട്ടിട്ടും പ്രതി ചേര്ത്ത സിപിഎം നേതാവ് പി പി ദിവ്യയെ ചോദ്യം ചെയ്യാന് പൊലീസ് തയ്യാറായില്ല. പൊലീസ് അന്വേഷണത്തില് മാത്രമല്ല റവന്യു വകുപ്പ് അന്വേഷണത്തിലും ദിവ്യയുടെ മൊഴിയെടുത്തിട്ടില്ല. ദിവ്യ സാവകാശം തേടിയെന്നായിരുന്നു കളക്ടര് ഉള്പ്പെടെയുള്ളവരുടെ മൊഴിയെടുത്ത ശേഷം എ ഗീത പറഞ്ഞു. ജില്ലാ കളക്ടര് അരുണ് കെ വിജയന് ഇന്നും ഔദ്യോഗിക പരിപാടികള് റദ്ദാക്കിയേക്കും.
