ബംഗളൂരു: കര്ണാടകയില് നവവധുവിനെ 27കാരനായ വരന് കുത്തിക്കൊന്നു. വിവാഹത്തിന് പിന്നാലെ ഉണ്ടായ തര്ക്കമാണ് പ്രകോപനത്തിന് കാരണമെന്ന് പൊലീസ് പറയുന്നു. കര്ണാടകയിലെ കോലാര് ഗോള്ഡ് ഫീല്ഡ്സില് (കെജിഎഫ്) ആണ് സംഭവം. ആന്ധ്രാപ്രദേശ് സ്വദേശിയായ നവീന് ആണ് കെജിഎഫ് സ്വദേശിനിയായ ലിഖിത ശ്രീയെ(20) കൊലപ്പെടുത്തിയത്. ബുധനാഴ്ച രാവിലെയായിരുന്നു വിവാഹം. താലികെട്ടിന് പിന്നാലെ നവീനും നിഖിതയും തമ്മില് തര്ക്കമുണ്ടായിരുന്നു. തര്ക്കം രൂക്ഷമായതോടെ കുപിതനായ നവീന് നവവധുവിനെ കുത്തി കൊല്ലുകയായിരുന്നു. ഇതിന് പിന്നാലെ അതേ കത്തിയെടുത്ത് സ്വയം ജീവനൊടുക്കാന് ശ്രമിച്ച നവീന് ഗുരുതരാവസ്ഥയില് ആശുപത്രിയില്
ചികിത്സയിലാണ്. ഇരുവരുടെയും പ്രേമ വിവാഹമായിരുന്നു. നവീനിന്റെ സഹോദരി മോണിക്കയുടെ വീട്ടില് വച്ചായിരുന്നു വിവാഹചടങ്ങ് നടന്നത്. വിവാഹ ശേഷം ബന്ധുവീട്ടില് എത്തിയ ദമ്പതികള് അവിടെ വച്ചാണ് തര്ക്കത്തിലേര്പ്പെട്ടതെന്ന് കെജിഎഫ് എസ്പി ശാന്തരാജു പറഞ്ഞു. നവീന് ലിഖിതയെ ആക്രമിക്കുകയും കുത്തുകയുമായിരുന്നു. ഇതിന് പിന്നാലെയാണ് നവീന് അതേ ആയുധം ഉപയോഗിച്ച് ആത്മഹത്യയ്ക്ക് ശ്രമിച്ചത്. ആന്റേഴ്സണ് പേട്ട് പൊലീസ് കേസെടുത്ത് അന്വേഷണം ആരംഭിച്ചു. കൊലപാതകത്തിന്റെ കൃത്യമായ കാരണം അന്വേഷിച്ചുവരികയാണെന്നു പൊലീസ് അറിയിച്ചു.
