മൂന്ന് വയസുകാരനോട് മുത്തച്ഛന്റെ ക്രൂരത. കുട്ടിയുടെ ദേഹത്ത് ചായ ഒഴിച്ച് മുത്തച്ഛന് പൊള്ളലേല്പ്പിച്ചു. വട്ടിയൂര്ക്കാവ് സ്വദേശികളായ ദമ്പതികളുടെ മകനാണ് പൊളളലേറ്റത്. ഗുരുതരമായി പരിക്കേറ്റ കുട്ടി എസ്എടി ആശുപത്രിയില് ചികിത്സയിലാണ്. കുട്ടിയുടെ അമ്മയുടെ രണ്ടാനച്ഛന് ആണ് ഇയാള്. ഈ മാസം 24നായിരുന്നു സംഭവം. ജോലിക്ക് പോകേണ്ടതിനാല് അമ്മ കുട്ടിയെ അമ്മൂമ്മയെ ഏല്പ്പിക്കുകയായിരുന്നു. മുത്തച്ഛന് കുട്ടിയെ നിരന്തരം ഉപദ്രവിക്കുമായിരുന്നുവെന്ന് പിതാവ് അഭിജിത്ത് പറഞ്ഞു. തിങ്കളാഴ്ച വൈകുന്നേരത്തോടെ വീട്ടില് കളിച്ചുകൊണ്ടിരുന്ന കുട്ടിയുടെ ദേഹത്ത് ചൂട് ചായ ഒഴിക്കുകയായിരുന്നു. പൊളളലേറ്റ് പിടഞ്ഞ കുട്ടിയെ ആശുപത്രിയില് എത്തിക്കാന് പോലും അയാള് വിട്ടില്ല. നാട്ടുകാര് വിവരമറിയിച്ചതിനെ തുടര്ന്ന് ജോലിക്കു പോയിരുന്ന അമ്മ എത്തിയാണ് കുട്ടിയെ ആശുപത്രിയില് എത്തിച്ചത്. ഗുരുതരമായി പരിക്കേറ്റ കുട്ടി ആശുപത്രിയില് തുടരുകയാണ്. വീട് നിര്മ്മാണവുമായി ബന്ധപ്പെട്ട തിരക്കുള്ളതിനാലാണ് വട്ടിയൂര്ക്കാവ് സ്വദേശികളായ അച്ഛനും അമ്മയും കുട്ടിയെ കൊടപ്പനക്കുന്നില് താമസിക്കുന്ന മുത്തച്ഛന്റെയും അമ്മൂമ്മയുടേയും അടുക്കലാക്കി ജോലിക്ക് പോയത്. ആശുപത്രി അധികൃതര് വിവരമറിയിച്ചതിനെ തുടര്ന്ന് ചൈല്ഡ് ലൈന് ഇടപെട്ട് മണ്ണന്തല സ്റ്റേഷനില് പരാതി നല്കിയെങ്കിലും കേസെടുക്കാനോ പ്രതിയെ അറസ്റ്റ് ചെയ്യാനോ പൊലീസ് ഇതുവരെ തയ്യാറായിട്ടില്ലെന്ന് പരാതിയുണ്ട്.