മലപ്പുറം: കെഎസ്ആര്ടിസി ബസും ഓട്ടോറിക്ഷയും കൂട്ടിയിടിച്ചുണ്ടായ അപകടത്തില് മൂന്ന് പേര് മരിച്ചു. മലപ്പുറം മേല്മുറി മുട്ടിപ്പടിയിലാണ് അപകടമുണ്ടായത്. മോങ്ങം ഒളമതില് സ്വദേശി അഷ്റഫ് (44) ഭാര്യ സാജിത (39) മകള് ഫിദ (14) എന്നിവരാണ് മരിച്ചത്. ബസിന് മുന്നിലേക്ക് നിയന്ത്രണം നഷ്ടപ്പെട്ട ഓട്ടോറിക്ഷ ഇടിച്ചു കയറുകയായിരുന്നുവെന്നാണ് വിവരം. അപകടത്തില് ഓട്ടോറിക്ഷ പൂര്ണമായും തകര്ന്നു. അഷറഫും മകള് ഫിദയും അപകടസ്ഥലത്ത് വെച്ചു തന്നെ മരിച്ചു. ആശുപത്രിയില് എത്തിയാണ് ഫാത്തിമയുടെ മരണം സ്ഥിരീകരിച്ചത്. മൃതദേഹങ്ങള് മഞ്ചേരി മെഡിക്കല് കോളേജ് ആശുപത്രിയില്.
ഫിദയെ പ്ലസ് വണ്ണിന് ചേര്ക്കാന് മലപ്പുറം ഗേള്സ് ഗവണ്മെന്റ് ഹയര് സെക്കന്ഡറി സ്കൂളിലേക്ക് പോകുന്നതിനിടെയാണ് അപകടം. പെരിന്തല്മണ്ണ ഡിപ്പോയില്നിന്നു വള്ളുവമ്പ്രത്തെ സര്വീസ് സെന്ററിലേക്കു പോകുകയായിരുന്നു കെഎസ്ആര്ടിസി ബസ്. ഡ്രൈവര് മാത്രമേ ബസിലുണ്ടായിരുന്നുള്ളൂ. പ്രൈവറ്റ് ഓട്ടോറിക്ഷയിലാണ് മരിച്ച കുടുംബം സഞ്ചരിച്ചിരുന്നത്. സംഭവത്തിന്റെ സിസിടിവി ദൃശ്യങ്ങള് പുറത്തുവന്നിട്ടുണ്ട്.