കോട്ടയം: പാമ്പാടിയില്‍ രണ്ട് യുവതികളുടെ മരണത്തിന് ഇടയാക്കിയ അപകടത്തില്‍ ബസ് ഡ്രൈവര്‍ക്കെതിരെ കേസെടുത്ത് പൊലീസ്. ബസ് അമിത വേഗത്തിലായിരുന്നുവെന്നാണ് പൊലീസ് പറയുന്നത്. കട്ടപ്പന കോട്ടയം റൂട്ടിലോടുന്ന സിഎംഎസ് ബസിലെ ഡ്രൈവര്‍ക്കെതിരെയാണ് മനഃപൂര്‍വമല്ലാത്ത നരഹത്യക്ക് കേസെടുത്തത്. ബസുകള്‍ മത്സരയോട്ടത്തിലായിരുന്നുവെന്നും പൊലീസ്. റോഡില്‍ നിന്ന് സംസാരിച്ച രണ്ട് പേര്‍ക്കെതിരെയും അന്വേഷണം തുടങ്ങിയിട്ടുണ്ട്. കഴിഞ്ഞ ബുധനാഴ്ചയായിരുന്നു അപകടം. മീനടം സ്വദേശിനികളായി ആഷ്ലി ആന്‍ തോമസ് (25), കൃപ (24) എന്നിവരായിരുന്നു അപകടത്തില്‍ മരിച്ചത്. പൊന്‍കുന്നം ഭാഗത്തേക്ക് പോകുകയായിരുന്നു സ്‌കൂട്ടറും കോട്ടയം ഭാഗത്തേക്ക് വരികയായിരുന്നു ബസ്സും ആയിരുന്നു അപകടത്തില്‍പ്പെട്ടത്. എതിര്‍ ദിശയില്‍ നിന്ന് വന്ന സ്‌കൂട്ടര്‍ യാത്രക്കാര്‍ മുന്നിലുണ്ടായിരുന്ന കാര്‍ ബ്രേക്കിട്ടപ്പോള്‍ നിയന്ത്രണം വിട്ട് ബസിനടിയിലേക്ക് വീഴുകയായിരുന്നു. തല്‍ക്ഷണം തന്നെ രണ്ടുപേരും മരിച്ചിരുന്നു. റോഡില്‍ സംസാരിച്ചു നില്‍ക്കുന്ന രണ്ടുപേരെയും ഇടിക്കാതിരിക്കാന്‍ കാര്‍ പെട്ടെന്ന് ബ്രേക്കിടുന്നതും പിന്നിലുണ്ടായ സ്‌കൂട്ടര്‍ യാത്രകര്‍ ബ്രേക്കിടുകയും തെന്നി ബസിനടിയിലേക്ക് വീഴുകയായിരുന്നു. ഇത് മറ്റൊരു വാഹനത്തിലെ ക്യാമറയില്‍ പതിഞ്ഞിരുന്നു.
