കാസര്‍കോട്: സീതാംഗോളിയില്‍ ഒരുസംഘം ആളുകള്‍ ഇലക്ട്രിക് കാര്‍ തടഞ്ഞ ശേഷം ഡ്രൈവറെ ഇറക്കിവിട്ട് വാഹനം തട്ടിക്കൊണ്ടുപോയതായി പരാതി. കാറിന്റെ ഉടമയായ പൂക്കട്ട സ്വദേശി മുഹമ്മദ് സയ്യിദ് മുസമ്മിലിന്റെ പരാതിയില്‍ കുമ്പള പൊലീസ് അന്വേഷണം ആരംഭിച്ചു. ചൊവ്വാഴ്ച രാത്രി 11 മണിയോടെയാണ് സംഭവം. കാര്‍ സീതാംഗോളിയിലെത്തിയപ്പോള്‍ ഒരുസംഘം ആളുകളെത്തി കാര്‍ തടയുകയായിരുന്നു. പിന്നീട് മുഹമ്മദിനെ ഇറക്കിവിട്ട് കാര്‍ തട്ടിക്കൊണ്ടുപോവുകയായിരുന്നെന്നാണ് വിവരം. പൊലിസിന്റെ അന്വേഷണത്തില്‍ കാര്‍ ചട്ടഞ്ചാല്‍ ഭാഗത്തുണ്ടെന്ന സൂചന ലഭിച്ചിട്ടുണ്ട്. സാമ്പത്തിക ഇടപാട് തര്‍ക്കത്തിന്റെ പേരിലാണ് കാര്‍ തട്ടിക്കൊണ്ടുപോയതെന്ന് സംശയിക്കുന്നതായി പൊലീസ് പറഞ്ഞു.