പി പി ചെറിയാൻ
ഡാളസ്: യുഎസിൽ ജൂൺടീൻത് ആഘോഷങ്ങൾ പുരോഗമിക്കുന്നതിനിടെ നോർത്ത് ടെക്സസ് മേഖലയെ തകിടം മറിച്ച് ഇടിമിന്നലോടു കൂടിയ കൊടുങ്കാറ്റും പെട്ടെന്നുള്ള വെള്ളപ്പൊക്കവുംപ്രകടമായതിനെ തുടർന്ന് മേഖലയിലെ നാൽപ്പതിനായിരത്തിലധികം വീടുകളിലും സ്ഥാപനങ്ങളിലും വൈദ്യുതിവിതരണം തടസ്സപ്പെട്ടു.
വ്യോമഗതാഗതത്തെയും കൊടുങ്കാറ്റ് സാരമായി ബാധിച്ചു. ഡാളസ്-ഫോർട്ട് വർത്ത് ഇന്റർനാഷണൽ എയർപോർട്ട്, ഡാളസ് ലവ് ഫീൽഡ് എന്നീ പ്രധാന വിമാനത്താവളങ്ങളിലായി എണ്ണൂറിലധികം സർവീസുകൾ വൈകുകയും, നാനൂറിലധികം വിമാന സർവീസുകൾ പൂർണ്ണമായി റദ്ദാക്കുകയും ചെയ്തു. പതിനായിരക്കണക്കിന് യാത്രക്കാരാണ് ഇതോടെ വിമാനത്താവളങ്ങളിൽ കുടുങ്ങിയത്.
പവർ കട്ട്: പ്രാദേശിക വൈദ്യുതി വിതരണ കമ്പനിയായ ഓൺകോറിന്റെ വിവരങ്ങൾ പ്രകാരം ഡാളസ് കൗണ്ടിയിലാണ് ഏറ്റവും കൂടുതൽ നാശനഷ്ടം. ഇവിടെ മാത്രം മുപ്പതിനായിരത്തോളം ഉപഭോക്താക്കൾ ഇരുട്ടിലാണ്. ഡെന്റൺ, കോളിൻ, ടാരന്റ് കൗണ്ടികളിലും വൈദ്യുതി ബന്ധം താറുമാറായി.
കനത്ത മഴയെ തുടർന്ന് പലയിടങ്ങളിലും ജൂൺടീൻത് പരേഡുകളും മറ്റ് പൊതുപരിപാടികളും താൽക്കാലികമായി മാറ്റിവെക്കുകയോ വൈകുകയോ ചെയ്തു.
