തൃശൂര്: വ്യാജ ബില് നല്കി പണം തട്ടാന് ശ്രമിച്ചതിന് മുന്സിഫ് മജിസ്ട്രേറ്റിന് സസ്പെന്ഷന്. തൃശൂര് ജുഡീഷ്യല് മൂന്നാംക്ലാസ് മജിസ്ട്രേറ്റ് ടിയാറ റോസ്മേരിയെ ആണ് സസ്പെന്ഡ് ചെയ്തത്. വ്യാജ മെഡിക്കല് ബില് നല്കി തുക തട്ടാന് ശ്രമിച്ചെന്നാണ് ഇവര്ക്കെതിരായ ആരോപണം. 30,000 രൂപയാണ് ഇവര് ഇത്തരത്തില് തട്ടിയെടുക്കാന് ശ്രമിച്ചതെന്ന് കണ്ടെത്തിയിരുന്നു. പിന്നാലെയാണ് നടപടി. ആറുമാസത്തേക്കാണ് സസ്പെന്ഷന്. ഇതിനിടയില് വിശദമായ അന്വേഷണവും നടത്തും.
ജില്ലാ ജുഡീഷ്യറിയുടെ ചുമതലയുള്ള രജിസ്ട്രാറാണ് മജിസ്ട്രേറ്റിനെ സസ്പെന്ഡ് ചെയ്തത്. കോസ്മെറ്റിക്സ് ഉല്പ്പന്നങ്ങള് ഉള്പ്പെടുന്ന ബില്ലാണ് ഇവര് തട്ടിപ്പ് നടത്താനായി നല്കിയത്. ബില് അപ്രൂവ് ചെയ്യണമെന്ന് ഇവര് ജില്ലാ മെഡിക്കല് ഓഫീസറോട് ആവശ്യപ്പെട്ടെങ്കിലും നല്കിയില്ല. തുടര്ന്ന് മെഡിക്കല് ഓഫീസറുടെ വ്യാജ സീലും വ്യാജ ഒപ്പുമിട്ട് ബില് തയാറാക്കി ഹൈക്കോടതിക്ക് നല്കുകയായിരുന്നു.
ബില്ലില് സംശയം തോന്നി ഹൈക്കോടതിയിലെ ബന്ധപ്പെട്ട വിഭാഗം പരിശോധന നടത്തിയപ്പോഴാണ് വ്യാജ ബില്ലാണെന്ന് കണ്ടെത്തിയത്. തുടര്ന്നാണ് ജില്ലാ ജുഡീഷ്യറി മജിസ്ട്രേറ്റിനെ സസ്പെന്ഡ് ചെയ്യാന് തീരുമാനിച്ചത്. നെയ്യാറ്റിന് കര മജിസ്ട്രേറ്റായിരിക്കെ എ.എസ്.ഐയോട് മോശം വാക്കുകള് ഉപയോഗിച്ചതിന് നേരത്തെ ഇവര് നടപടി നേരിട്ടിരുന്നു.
