കൊളംബോ: വനിതാ ഹോട്ടല് ജീവനക്കാരിയോട് മോശമായി പെരുമാറിയ പാകിസ്ഥാന് താരത്തിന് പിഴ. ഐസിസി പുരുഷ ടി20 ലോകകപ്പ് മത്സരങ്ങള്ക്കായി ശ്രീലങ്കയിലെ കാന്ഡിയില് ഒരു ഹോട്ടലില് താമസിക്കുന്നതിനിടെയാണ് സംഭവം. എന്നാല് ഏത് താരത്തിനാണ് പിഴ ചുമത്തിയതെന്ന് വ്യക്തമാക്കിയിട്ടില്ല. ആതിഥേയരായ ശ്രീലങ്കയ്ക്കെതിരായ പാകിസ്ഥാന്റെ അവസാന സൂപ്പര് 8 മത്സരത്തിന് മുമ്പാണ് സംഭവം. പാകിസ്ഥാന് ക്രിക്കറ്റ് ബോര്ഡിലും ടീം സര്ക്കിളുകളിലും സംഭവം ചര്ച്ചയായതായി ടെലികോം ഏഷ്യ സ്പോര്ട് റിപ്പോര്ട്ട് ചെയ്തു.
‘ശ്രീലങ്കയ്ക്കെതിരായ പാകിസ്ഥാന്റെ അവസാന സൂപ്പര് എട്ട് മത്സരത്തിന് മുമ്പ്, ഒരു പാകിസ്ഥാന് ലോകകപ്പ് സ്ക്വാഡ് താരം ഒരു വനിതാ ഹൗസ് കീപ്പിംഗ് സ്റ്റാഫ് അംഗത്തോട് മോശമായി പെരുമാറി’ – ടെലികോം ഏഷ്യ സ്പോര്ട്സ് റിപ്പോര്ട്ട് ചെയ്തു. ജീവനക്കാരി സഹായത്തിനായി നിലവിളിക്കുകയും തുടര്ന്ന് ഹോട്ടല് ജീവനക്കാര് അവരുടെ രക്ഷയ്ക്കെത്തുകയും ചെയ്തു. തുടര്ന്ന് പാകിസ്ഥാന് ടീം മാനേജര് നവൈദ് ചീമയെ വിവരം അറിയിച്ചതായും ടീം വൃത്തങ്ങളെ ഉദ്ധരിച്ച് ഏഷ്യ സ്പോര്ട്സ് റിപ്പോര്ട്ട് ചെയ്തു.
ഗോള്ഡന് ക്രൗണ് ഹോട്ടല് വിഷയത്തില് ശക്തമായ നടപടി എടുക്കണമെന്ന് ആവശ്യപ്പെട്ടെങ്കിലും കളിക്കാരന് വേണ്ടി ചീമ ക്ഷമാപണം നടത്തുകയും മോശം പെരുമാറ്റത്തിന് പിഴ ചുമത്തുകയും ചെയ്തു. മത്സരത്തില് പാകിസ്ഥാന് അഞ്ച് റണ്സിന് വിജയിച്ചെങ്കിലും, നെറ്റ് റണ് റേറ്റില് ടീം സെമിഫൈനലിലെത്താന് കഴിയാതെ നാട്ടിലേക്ക് മടങ്ങി.
ആരോപണ വിധേയനായ കളിക്കാരന് പാകിസ്ഥാന് ക്രിക്കറ്റ് ബോര്ഡ് അച്ചടക്ക സമിതിക്ക് മുമ്പാകെ ഹാജരാകേണ്ടി വരും. മാത്രമല്ല കൂടുതല് ശിക്ഷാനടപടിക്ക് വിധേയനാകാനും സാധ്യതയുണ്ട്.
ഇതാദ്യമായല്ല പാകിസ്ഥാന് താരങ്ങള്ക്കെതിരെ ഇത്തരം ആരോപണങ്ങള് ഉയരുന്നത്. ഇംഗ്ലണ്ട് പര്യടനത്തിനിടെ ഒരു പെണ്കുട്ടിയെ ബലാത്സംഗം ചെയ്തതിന് കഴിഞ്ഞ വര്ഷം മാഞ്ചസ്റ്റര് പൊലീസ് യുവ ബാറ്റ്സ്മാന് ഹൈദര് അലിയെ അറസ്റ്റ് ചെയ്തിരുന്നു. കേസ് കോടതിയിലെത്തിയെങ്കിലും തെളിവുകളുടെ അഭാവത്തില് വിട്ടയച്ചു.
ഏതാനും വര്ഷങ്ങള്ക്ക് മുമ്പ് മലേഷ്യന് പര്യടനത്തിനിടെ ഒരു വനിതാ സ്റ്റാഫ് അംഗത്തോട് മോശമായി പെരുമാറിയതിന് പാകിസ്ഥാന് ടീമിന്റെ മസാജ് ചെയര്മാനായ മലംഗ് അലിക്കെതിരെ നടപടിയെടുക്കുകയും പിഴ ചുമത്തുകയും ചെയ്തിരുന്നു.
