തിരുവനന്തപുരം: അനധികൃത വൈദ്യുതി വേലിയില് നിന്ന് ഷോക്കേറ്റ് അച്ഛനും മകനും മരിച്ചു.
തിരുവനന്തപുരം നഗരൂരിലാണ് സംഭവം. ചെങ്കിക്കുന്ന് സ്വദേശികളായ കൊച്ചുണ്ണിയും (60) മകന് അഖിലുമാണ് (35) മരിച്ചത്. സംഭവവുമായി ബന്ധപ്പെട്ട് പുരയിടത്തില് അനധികൃതമായി വൈദ്യുതി വേലി സ്ഥാപിച്ച സ്ഥലമുടമയ്ക്കെതിരെ പൊലീസ് കേസെടുത്തു.
തിങ്കളാഴ്ച രാത്രിയിലാണ് അപകടം ഉണ്ടായതെന്നാണ് പ്രാഥമിക നിഗമനം. പുരയിടത്തിന് സമീപത്തേയ്ക്ക് വന്നപ്പോള് ഇരുവര്ക്കും ഷോക്കേറ്റതാകാം എന്ന് പ്രദേശവാസികള് പറയുന്നു. മരച്ചീനി കൃഷി ചെയ്യുന്ന സ്ഥലത്ത് കാട്ടുപന്നിയുടെ ശല്യം ഉണ്ട്. ഇവയുടെ ശല്യം ഒഴിവാക്കാന് സ്ഥാപിച്ച അനധികൃത വൈദ്യുതി വേലിയില് നിന്നാണ് ഇരുവര്ക്കും ഷോക്കേറ്റത്.
ഈ പുരയിടത്തിന് അടുത്താണ് അച്ഛനും മകനും താമസിക്കുന്നത്. ഇവിടെ വൈദ്യുതി വേലി സ്ഥാപിച്ചിരുന്ന കാര്യം നേരത്തെ അറിയാമായിരുന്നുവെന്ന് പ്രദേശവാസികള് പറയുന്നു. എന്നാല് മരിച്ച കൊച്ചുണ്ണിക്കും അഖിലിനും ഇക്കാര്യം അറിയുമോ എന്ന് വ്യക്തമല്ല. സംഭവത്തില് പൊലീസ് അന്വേഷണം ആരംഭിച്ചു.
