കോഴിക്കോട്: ലൈംഗികാതിക്രമ ആരോപണം നേരിട്ടതിന് പിന്നാലെ കോഴിക്കോട് ഗോവിന്ദപുരം സ്വദേശി ദീപക് ജീവനൊടുക്കിയ സംഭവത്തില് പ്രതി ഷിംജിതയ്ക്ക് ജാമ്യം. കോഴിക്കോട് പ്രിന്സിപ്പല് സെഷന്സ് കോടതിയാണ് ജാമ്യം അനുവദിച്ചത്. 21 ദിവസത്തെ ജയില്വാസത്തിനുശേഷമാണ് മഞ്ചേരി വനിത സബ് ജയിലില് നിന്ന് ഷിംജിത പുറത്തുവരുന്നത്. കുന്നമംഗലം മജിസ്ട്രേറ്റ് കോടതി ജാമ്യാപേക്ഷ തള്ളിയതിനെ തുടര്ന്നാണ് ഷിംജിത കോഴിക്കോട് പ്രിന്സിപ്പല് സെഷന്സ് കോടതിയെ സമീപിച്ചത്.
അന്വേഷണത്തിന്റെ ഭാഗമായി ദീപക്കിന്റെ വീട്ടില് നിന്നു പൊലീസ് കസ്റ്റഡിയില് എടുത്ത തൊണ്ടിമുതലുകളായ ലാപ്ടോപ്, മൊബൈല് ഫോണ് എന്നിവയുടെ ഫൊറന്സിക് പരിശോധനാഫലം ലഭിക്കുംവരെ ഷിംജിതയ്ക്ക് ജാമ്യം അനുവദിക്കരുതെന്ന് പ്രോസിക്യൂഷന് കോടതിയില് വാദിച്ചു. ദീപക്കിനെ ഷിംജിത ഏതെങ്കിലും തരത്തില് ഭീഷണിപ്പെടുത്താന് ശ്രമിച്ചോ എന്ന് ഇതില് വ്യക്തമാകും എന്നും പ്രോസിക്യൂഷന് വാദിച്ചു.
21 ദിവസമായി ജയിലില് ആണെന്നും ഫൊറന്സിക് ഫലം വരുന്നത് വരെ റിമാന്ഡില് കഴിയേണ്ടതില്ലെന്നുമായിരുന്നു പ്രതിഭാഗം കോടതിയില് വാദിച്ചത്. അന്വേഷണത്തില് പ്രതി സഹകരിക്കുന്നുണ്ടെന്നും അതിനാല് തന്നെ ജാമ്യം അനുവദിക്കണമെന്നും പ്രതിഭാഗം അഭിഭാഷകന് വാദിച്ചു. അതേസമയം, തനിക്കു നേരെ ബസില് വച്ച് ലൈംഗികാതിക്രമം ഉണ്ടായി എന്ന ആരോപണത്തില് ഷിംജിത ഉറച്ചുനില്ക്കുകയാണ്.
ദീപക് ആത്മഹത്യ ചെയ്ത സംഭവത്തില് മാതാവ് നല്കിയ പരാതിയിലാണ് ഷിജിതയെ ആത്മഹത്യാപ്രേരണാ കുറ്റം ചുമത്തി അറസ്റ്റ് ചെയ്തത്.
