കാസര്‍കോട്: ഓണ്‍ലൈന്‍ ട്രേഡിംഗ് വഴി ഇച്ചിലങ്കോട് സ്വദേശി സുരേശ ഷെട്ടിയുടെ 34,47,777രൂപ തട്ടിയെടുത്തതായി പരാതി. പണം നഷ്ടപ്പെട്ട 54 കാരന്റെ പരാതിയില്‍ കാസര്‍കോട് സൈബര്‍ പൊലീസ് കേസെടുത്ത് അന്വേഷണം തുടങ്ങി. 2025 സെപ്തംബര്‍ രണ്ടുമുതല്‍ ഡിസംബര്‍ 30 വരെയുള്ള കാലയളവിലാണ് തട്ടിപ്പ് നടന്നത്. ഫേസ് ബുക്ക്, വാട്‌സ്ആപ്പ്, ടെലഗ്രാം എന്നിവ വഴി മെസേജ് അയച്ചാണ് പരാതിക്കാരനെ ചതിയില്‍ വീഴ്ത്തിയതെന്നു സൈബര്‍ പൊലീസ് രജിസ്റ്റര്‍ ചെയ്ത കേസില്‍ പറയുന്നു.
വിവിധ അക്കൗണ്ടുകളിലേയ്ക്ക് പലതവണകളായാണ് പണം അയപ്പിച്ചതെന്നു കൂട്ടിച്ചേര്‍ത്തു. ലാഭവിഹിതമോ, നിക്ഷേപതുകയോ തിരിച്ചു കിട്ടാത്തതിനെ തുടര്‍ന്നാണ് തട്ടിപ്പാണെന്നു വ്യക്തമായത്.
അതേസമയം സൈബര്‍ തട്ടിപ്പിനെതിരെ ജാഗ്രതയ്ക്കു നിര്‍ദ്ദേശം നല്‍കുകയും ബോധവല്‍ക്കരണം നടത്തുകയും ചെയ്യുന്നതിനിടയില്‍ തട്ടിപ്പുകള്‍ വര്‍ധിക്കുന്നത് ആശങ്കയ്ക്ക് ഇടയാക്കിയിട്ടുണ്ട്. ഏതാനും ആഴ്ചകള്‍ക്കു മുമ്പാണ് നീലേശ്വരത്തെ ഒരു ഡോക്ടറുടെ കോടിക്കണക്കിനു രൂപ സൈബര്‍ തട്ടിപ്പ് സംഘം തട്ടിയെടുത്ത സംഭവം പുറത്തുവന്നത്.