ആദ്യ ബഹിരാകാശ യാത്രികന്‍ ഹനുമാനാണെന്ന് ബിജെപി എംപി അനുരാഗ് ഠാക്കൂര്‍. ദേശീയ ബഹിരാകാശ ദിനത്തില്‍ ഹിമാചല്‍ പ്രദേശിലെ പിഎം ശ്രീ സ്‌കൂളിലെ വിദ്യാര്‍ത്ഥികളോട് സംവദിക്കവെയാണ് അനുരാഗ് ഠാക്കൂര്‍ വിവാദ പരാമര്‍ശം നടത്തിയത്. ആദ്യത്തെ ബഹിരാകാശ യാത്രികന്‍ ആരാണെന്ന് അനുരാഗ് ഠാക്കൂര്‍ വിദ്യാര്‍ത്ഥികളോട് ചോദിച്ചു. വിദ്യാര്‍ത്ഥികള്‍ ഒരുമിച്ച് നീല്‍ ആംസ്ട്രോങ് എന്ന് ഉത്തരം നല്‍കി. അപ്പോഴാണ് ആദ്യ ബഹിരാകാശ യാത്രികന്‍ ഹനുമാനാണെന്നാണ് താന്‍ കരുതുന്നതെന്ന് അനുരാഗ് ഠാക്കൂര്‍ പറഞ്ഞത്. ഇന്ത്യന്‍ പാരമ്പര്യത്തെക്കുറിച്ച് അറിയാന്‍ പാഠപുസ്തകങ്ങള്‍ക്ക് പുറത്തേക്ക് നോക്കണമെന്നും അദ്ദേഹം കുട്ടികളോട് പറഞ്ഞു. നമ്മളിപ്പോഴും വര്‍ത്തമാനക്കാലത്തിലാണെന്നും ആയിരക്കണക്കിനു വര്‍ഷം പഴക്കമുള്ള പാരമ്പര്യം, അറിവ്, സംസ്‌കാരം…
എന്നിവ തിരിച്ചറിയാത്തിടത്തോളം ബ്രിട്ടിഷുകാര്‍ കാണിച്ചു തന്നതുപോലെ നമ്മള്‍ തുടരുമെന്നും അനുരാഗ് ഠാക്കൂര്‍ കൂട്ടിച്ചേര്‍ത്തു. എന്നാല്‍ ബഹിരാകാശത്തേക്ക് ആദ്യമായി യാത്ര ചെയ്തത് യൂറി ഗഗാറിനും ചന്ദ്രനില്‍ ആദ്യമായി കാലുകുത്തിയത് നീല്‍ ആംസ്ട്രോങ്ങുമാണ്. അതേസമയം, അനുരാഗിന്റെ പരാമര്‍ശത്തിനെതിരെ കനിമൊഴി എംപി രംഗത്തെത്തിയിട്ടുണ്ട്. വിദ്യാര്‍ത്ഥികളെ തെറ്റിദ്ധരിപ്പിക്കുന്നതിലൂടെ വിജ്ഞാനത്തെ തന്നെ അപമാനിക്കുകയാണ് അനുരാഗ് ചെയ്യുന്നതെന്ന് അവര്‍ പറഞ്ഞു. കുട്ടികളെ തെറ്റിദ്ധരിപ്പിക്കുന്നത് ഭരണഘടനയോടുളള അവഹേളനമാണെന്നും ശാസ്ത്രീയ മനോഭാവം വളര്‍ത്തണമെന്ന തത്വത്തെ അവഹേളിക്കുകയാണെന്നും അവര്‍ കൂട്ടിച്ചേര്‍ത്തു.
ഓട്ടോ ടെമ്പോ ഒഴുകിപ്പോയി; യാത്രക്കാര് നീന്തി രക്ഷപ്പെട്ടു
Friday, 29 August 2025, 13:22
