ചെന്നൈ: ഇന്ത്യന്‍ റെയില്‍വേയുടെ ആദ്യ ഹൈഡ്രജന്‍ ട്രെയിന്‍ ഉടന്‍ ട്രാക്കിലെത്തും. ചെന്നൈ പെരമ്പൂര്‍ കോച്ച് ഫാക്ടറിയില്‍ കോച്ചുകളുടെ നിര്‍മാണം പൂര്‍ത്തിയായി. ഇതോടെ ഹൈഡ്രജന്‍ ട്രെയിനുള്ള ലോകത്തെ അഞ്ചാമത്തെ രാജ്യമായി ഇന്ത്യ മാറും. ജര്‍മനി, ഫ്രാന്‍സ്, സ്വീഡന്‍, ചൈന എന്നീ രാജ്യങ്ങള്‍ക്ക് ഹൈഡ്രജന്‍ ട്രെയിനുണ്ട്. 1200 എച്ച് പി കരുത്തുള്ള എന്‍ജിനുകളാണ് ചെന്നൈയില്‍ തയ്യാറായ ഹൈഡ്രജന്‍ ട്രെയിനുള്ളത്. നിരീക്ഷണ ക്യാമറകളും ഓട്ടോമാറ്റിക് ഡോളുകളുമുണ്ടാകും. മണിക്കൂറില്‍ 110 കിലോ മീറ്റര്‍ വരെ വേഗത കൈവരിക്കും. ഈ സെഗ്മെന്റിലുള്ള ലോകത്തെ ഏറ്റവും ശക്തവും നീളമേറിയതുമായ ട്രെയിനായിരിക്കും ഇന്ത്യയുടെത്. 2,600 യാത്രക്കാര്‍ക്ക് യാത്ര ചെയ്യാം. അതേസമയം, ഈ ട്രെയിന്‍ നോര്‍ത്തേണ്‍ റെയില്‍വേ പരിധിയിലാണ് ഓടുക. ഹരിയാനയിലായിരിക്കും സര്‍വീസ്. സോനിപത്- ജിന്ധ് പാതയില്‍ ഉടന്‍ പരീക്ഷണയോട്ടമുണ്ടാകും. ഓരോ പവര്‍ കാറും പ്രത്യേകം രൂപകല്‍പ്പന ചെയ്ത സിലിണ്ടറുകളില്‍ 220 കിലോ ഹൈഡ്രജന്‍ വഹിക്കും. ഹൈഡ്രജന്‍ ട്രെയിന്‍ അന്തിമ കമ്മീഷന്‍ ചെയ്യുന്നതിന് സജ്ജമായതായി റെയില്‍വേ മന്ത്രാലയം നേരത്തെ എക്സില്‍ സ്ഥിരീകരിച്ചിരുന്നു.