ഹൈദരാബാദ്: ഗോത്ര വിഭാഗങ്ങൾക്കെതിരായി പരാമർശം നടത്തിയ തെലുങ്ക് നടൻ വിജയ് ദേവരകൊണ്ടയ്ക്കെതിരെ എസ്.സി – എസ് ടി നിയമപ്രകാരം പൊലീസ് കേസെടുത്തു. കഴിഞ്ഞ ഏപ്രിലിൽ സൂര്യ നായകനായ തമിഴ് ചിത്രം റെട്രോയുടെ പ്രമോഷൻ പരിപാടിക്കിടെയാണ് വിവാദ പരാമർശം. പരിപാടിയിൽ സംസാരിക്കുന്നതിനിടെ പഹൽഗാമിൽ നടന്ന ഭീകരാക്രമണത്തെ 500 വർഷങ്ങൾക്കു മുൻപ് നടന്ന ഗോത്ര യുദ്ധവുമായി വിജയ് ദേവരകൊണ്ട താരതമ്യപ്പെടുത്തുകയായിരുന്നു. പിന്നാലെ നടൻ ഗോത്ര വിഭാഗത്തിന്റെ വികാരങ്ങളെ വ്രണപ്പെടുത്തിയെന്ന് ആരോപിച്ച് ഗോത്രവിഭാഗ സംയുക്ത ആക്ഷൻ കമ്മിറ്റിയുടെ സംസ്ഥാന പ്രസിഡന്റ് നെനാവത്ത് അശോക് കുമാർ പൊലീസിനെ സമീപിച്ചു. പാക്കിസ്താൻ ഭീകരരുമായി ഗോത്ര വിഭാഗത്തെ താരതമ്യം ചെയ്തത് വംശീയമായ അധിക്ഷേപമാണെന്നു പരാതിയിൽ പറയുന്നു. ഈ പരാതിയിന്മേലാണ് കഴിഞ്ഞ ദിവസം പൊലീസ് നടനെതിരെ കേസെടുത്തത്. പരാമർശം വിവാദമായതോടെ ഒരു വിഭാഗത്തെയും വേദനിപ്പിക്കാനോ അപമാനിക്കാനോ ഉദ്ദേശിച്ചിട്ടില്ലെന്ന് വിജയ് വ്യക്തമാക്കിയിരുന്നു.