മംഗളൂരു: കദ്രി മഞ്ജുനാഥ ക്ഷേത്രത്തിന് സമീപത്തെ ഉപയോഗ ശൂന്യമായ വാട്ടര്‍ ടാങ്കില്‍ നൂറ്റാണ്ടുകള്‍ പഴക്കമുള്ള തലയില്ലാത്ത ബുദ്ധപ്രതിമയും 3 പുരാതന ഗുഹകളും കണ്ടെത്തി. തലയും വലതുകൈയും വേര്‍പെട്ട നിലയിലാണ് പ്രതിമ. ധ്യാനമുദ്രയില്‍ ഒരു പത്മപീഠത്തില്‍ പത്മാസന സ്ഥാനത്തായിരുന്നു പ്രതിമ. എ.ഡി. 4 മുതല്‍ 6 വരെ നൂറ്റാണ്ടുകളില്‍ നിര്‍മ്മിച്ചതാണ് ഈ ബുദ്ധ പ്രതിമയെന്ന് ഷിര്‍വയിലെ എംഎസ്ആര്‍എസ് കോളേജിലെ മുന്‍ അസോസിയേറ്റ് പ്രൊഫസര്‍ ടി മുരുഗേഷി പറയുന്നു. പ്രദേശത്തിന്റെ ബുദ്ധമത പൈതൃകത്തെക്കുറിച്ചുള്ള അടയാളമാണിതെന്ന് അദ്ദേഹം പറഞ്ഞു. ഏകദേശം 68 സെന്റീമീറ്റര്‍ ഉയരവും 48 സെന്റീമീറ്റര്‍ വീതിയുമുണ്ട് ഈ പ്രതിമക്ക്. ക്ഷേത്ര അധികൃതരുടെ അനുമതിയോടെ വിശദമായ പരിശോധനയ്ക്കായി വെള്ളത്തില്‍ നിന്ന് പുറത്തെടുത്തു. സമീപത്തെ പാറകളില്‍ 3 ഗുഹകളും കണ്ടെത്തയിട്ടുണ്ട്. ഗുഹകള്‍ക്ക് ഏകദേശം എട്ട് അടി ഉയരമുണ്ട്. അര്‍ദ്ധവൃത്താകൃതിയിലുള്ള പ്രവേശന കവാടവുമുണ്ട്. ഗുഹക്കുള്ളില്‍ മുറികളുമുണ്ട്. ബുദ്ധമത സന്യാസികള്‍ താമസിച്ചവയാകാമെന്ന് അനുമാനിക്കുന്നു. പത്താം നൂറ്റാണ്ട് വരെ കദ്രി ഒരു പ്രമുഖ ബുദ്ധമത കേന്ദ്രമായിരുന്നുവെന്ന് പ്രൊഫ. മുരുഗേഷി എടുത്തുപറഞ്ഞു.