-പി പി ചെറിയാന്‍
ഹ്യൂസ്റ്റണ്‍: ബുധനാഴ്ച രാത്രി തെക്കുകിഴക്കന്‍ ഹൂസ്റ്റണ്‍ അപ്പാര്‍ട്ട്‌മെന്റില്‍ അതിക്രമിച്ചു കയറിയ മോഷ്ടാവിനെ വെടിവച്ചു കൊന്നു.
എന്‍ആര്‍ജി സ്റ്റേഡിയത്തിന് സമീപമുള്ള വെസ്റ്റ്രിഡ്ജ് സ്ട്രീറ്റിലെ ഒരു അപ്പാര്‍ട്ട്‌മെന്റില്‍ അതിക്രമിച്ചു കടന്ന മൂന്നംഗ സംഘത്തെ അപ്പാര്‍ട്‌മെന്റിലെ രണ്ട് വാടകക്കാരില്‍ ഒരാള്‍ വെടിവയ്ക്കുകയായിരുന്നു.
മുഖംമൂടി ധരിച്ചവരില്‍ ഒരാള്‍ വാതിലില്‍ മുട്ടിയപ്പോള്‍, മറ്റു രണ്ടുപേര്‍ ജനാലയിലൂടെ അകത്തുകടക്കാന്‍ ശ്രമിച്ചു. അപ്പോഴേക്കും താമസക്കാര്‍ 911 എന്ന നമ്പറില്‍ വിളിച്ചു. ഹ്യൂസ്റ്റണ്‍ പിഡിയില്‍ നിന്നുള്ള വാര്‍ത്താക്കുറിപ്പില്‍ പറഞ്ഞു.
പിന്നീട് മോഷ്ടാക്കളില്‍ ഒരാള്‍ വാടകക്കാര്‍ക്ക് നേരെ തോക്ക് ചൂണ്ടിയതായും വാടകക്കാരില്‍ ഒരാള്‍ കൈകളില്‍ നിന്ന് തോക്ക് തട്ടിയതിനെത്തുടര്‍ന്ന് വഴക്കുണ്ടായതായും പോലീസ് പറഞ്ഞു. വഴക്കിനിടെ, കള്ളന്‍ ‘അരക്കെട്ടില്‍ നിന്ന് രണ്ടാമത്തെ തോക്ക് പുറത്തെടുത്തു’ എന്ന് പൊലീസ് പറഞ്ഞു. കള്ളനുമായി വഴക്കിട്ട 20 വയസ്സുള്ള അജ്ഞാതന്‍ പ്രതിയില്‍ നിന്ന് തോക്ക് തട്ടിയെടുത്ത് വെടിവച്ചു.
പൊലീസ് എത്തുമ്പോഴേക്കും മറ്റ് രണ്ട് മോഷ്ടാക്കള്‍ ഓടി രക്ഷപ്പെട്ടു. സംഘര്‍ഷത്തിനിടെ വെടിയേറ്റ മൂന്നാമന്‍ പരിക്കേറ്റ് മരിച്ചതായി പൊലീസ് കണ്ടെത്തി. 18 വയസ്സുള്ള ആളാണ് ഇയാളെന്ന് മാത്രമേ പൊലീസ് തിരിച്ചറിഞ്ഞിട്ടുള്ളൂ.
