പി പി ചെറിയാന്‍

ഹ്യൂസ്റ്റണ്‍: ഹ്യൂസ്റ്റണി ലെ അനധികൃത ഗെയിം റൂമുകളില്‍ നടത്തിയ പരിശോധനയില്‍ കോടിക്കണക്കിന് ഡോളര്‍ തട്ടിപ്പ് നടത്തിയതിന് അറസ്റ്റിലായ 45 പേരില്‍ റിച്ച്മണ്ടില്‍ നിന്നുള്ള 61 വയസ്സുള്ള റിംഗ് ലീഡറും പാകിസ്ഥാന്‍ പൗരനുമായ നിസാര്‍ അലിയും (61) ഉള്‍പ്പെടുന്നുവെന്നു പൊലീസ് കേന്ദ്രങ്ങള്‍ പറഞ്ഞു. ഫെഡറല്‍ ഉദ്യോഗസ്ഥര്‍ പറയുന്നതനുസരിച്ച്, ബുധനാഴ്ച നടന്ന പൊലീസ് റെയ്ഡുകളില്‍ അയാളുടെ 30 ഗെയിം റൂമുകള്‍ ഉള്‍പ്പെട്ടിരുന്നു. ഹ്യൂസ്റ്റണിലുടനീളം ബുധനാഴ്ച അനധികൃത ഗെയിമിംഗ് റൂമുകളില്‍ വ്യാപകമായ റെയ്ഡ് ഉണ്ടായിരുന്നു. നിരവധി ആളുകളെ അറസ്റ്റ് ചെയ്തു, ഉദ്യോഗസ്ഥര്‍ മെഷീനുകള്‍ കണ്ടുകെട്ടി. റെയ്ഡില്‍ 720-ലധികം നിയമ നിര്‍വ്വഹണ ഏജന്റുമാരും ഉദ്യോഗസ്ഥരും പങ്കെടുത്തുവെന്നു യുഎസ് അറ്റോര്‍ണി നിക്കോളാസ് ഗഞ്ചെയ് പറയുന്നു. ഹ്യൂസ്റ്റണ്‍ പൊലീസ്, ഹാരിസ് കൗണ്ടി ഷെരീഫ് ഓഫീസ്, ഹോംലാന്‍ഡ് സെക്യൂരിറ്റി ഇന്‍വെസ്റ്റിഗേഷന്‍സ് (എച്ച്എസ്‌ഐ), ഐആര്‍എസ്, എഫ്ബിഐ എന്നിവയുള്‍പ്പെടെ ഏകദേശം 20 പ്രാദേശിക, ഫെഡറല്‍ ഏജന്‍സികള്‍ ഈ ഓപ്പറേഷനില്‍ പങ്കെടുത്തു.
‘എല്‍ പോര്‍ട്ടല്‍’, ‘യെല്ലോ ബില്‍ഡിംഗ്’ തുടങ്ങിയ പേരുകളുള്ള 30 അനധികൃത ഗെയിമിംഗ് റൂമുകള്‍ ഉള്‍പ്പെടെ ഹ്യൂസ്റ്റണ്‍ പ്രദേശത്തുടനീളം മൊത്തം 45 സ്ഥലങ്ങളില്‍ ഉദ്യോഗസ്ഥര്‍ റെയ്ഡ് നടത്തി.
ഒന്നിലധികം ഏജന്‍സികള്‍ ഉള്‍പ്പെട്ട അഞ്ച് വര്‍ഷത്തെ ‘ഓപ്പറേഷന്‍ ഡബിള്‍ ഡൗണ്‍’ ഓപ്പറേഷന്റെ ഫലമായാണ് റെയ്ഡുകള്‍ നടന്നതെന്ന് ഗഞ്ചെയ് പറയുന്നു. 16 സംശയിക്കപ്പെടുന്നവര്‍ക്കെതിരെ ഉദ്യോഗസ്ഥര്‍ 85 വാറണ്ടുകളും 37 കുറ്റപത്രവും നടപ്പിലാക്കിയിരുന്നു. നിയമവിരുദ്ധമായ ചൂതാട്ട ബിസിനസ്, റാക്കറ്റിംഗിന് അഞ്ച് വര്‍ഷം വരെ തടവ് ശിക്ഷ ലഭിക്കും. പ്രതികള്‍ക്കെതിരെ കള്ളപ്പണം വെളുപ്പിക്കല്‍ ഗൂഢാലോചന കുറ്റവും ചുമത്തിയിട്ടുണ്ട്, ഇതിന് 20 വര്‍ഷം വരെയാണ് തടവ് ശിക്ഷ.
അറസ്റ്റുകള്‍ക്ക് പുറമേ, 2,000-ത്തിലധികം അനധികൃത സ്ലോട്ട് മെഷീനുകള്‍, എട്ട് തോക്കുകള്‍, ‘നിരവധി ഉയര്‍ന്ന നിലവാരമുള്ള വാഹനങ്ങള്‍’, 100 റോളക്‌സ് വാച്ചുകള്‍, 4.5 മില്യണ്‍ ഡോളര്‍ പണം, അക്കൗണ്ടുകളില്‍ നിന്നും മറ്റ് ധനകാര്യ സ്ഥാപനങ്ങളില്‍ നിന്നും 6.5 മില്യണ്‍ ഡോളര്‍ എന്നിവ ഉദ്യോഗസ്ഥര്‍ പിടിച്ചെടുത്തു.