കണ്ണൂര്:കേളകം മലയാംപടിയില് നാടകസംഘം സഞ്ചരിച്ച മിനി ബസ് മറഞ്ഞു. അപകടത്തില് രണ്ട് നടിമാര് മരിച്ചു. കായംകുളം മുതുകുളം സ്വദേശി അഞ്ജലി (32), കരുനാഗപ്പള്ളി തേവലക്കര സ്വദേശിനി ജെസി മോഹന് എന്നിവരാണ് മരിച്ചത്. അപകടത്തില് പരിക്കേറ്റ ഒരാളുടെ നില ഗുരുതരമാണ്.
രാത്രി നാടകം കഴിഞ്ഞ് ഇന്നു പുലര്ച്ചെ നാലുമണിയോടെ കടന്നപ്പള്ളിയില് നിന്ന് ബത്തേരിയിലേക്ക് പോയ വാഹനമാണ് അപകടത്തില്പ്പെട്ടത്. മലയാംപടി എസ് വളവില് വച്ച് മിനി ബസ് മറിയുകയായിരുന്നു. 14 പേരാണ് സംഘത്തില് ഉണ്ടായിരുന്നത്. 9 പേരെ പരിക്കുകളോടെ കണ്ണൂരിലെ സ്വകാര്യ ആശുപത്രിയില് പ്രവേശിപ്പിച്ചു. ദേവ കമ്മ്യൂണിക്കേഷന് കായംകുളം എന്ന നാടക സംഘം സഞ്ചരിച്ച മിനി ബസാണ് അപകടത്തില്പ്പെട്ടത്.
കായംകുളം സ്വദേശികളായ ഉണ്ണി, ഉമേഷ്, സുരേഷ്, ഷിബു, എറണാകുളം സ്വദേശികളായ വിജയകുമാര്, ബിന്ദു, കല്ലുവാതുക്കല് സ്വദേശി ചെല്ലപ്പന്, കൊല്ലം സ്വദേശി ശ്യാം, അതിരുങ്കല് സ്വദേശി സുഭാഷ് എന്നിവരാണ് അപകടത്തില് പരിക്കേറ്റ് കണ്ണൂരില് സ്വകാര്യ ആശുപത്രിയില് ചികിത്സയിലുള്ളത്. കായംകുളം സ്വദേശി ഉമേഷിന്റെ നില ഗുരുതരമാണ്.
