ബംഗ്‌ളൂരു: മദ്യലഹരിയില്‍ വീട്ടിലെത്തി ബഹളം വയ്ക്കുന്നത് പതിവാക്കിയ മകനെ അച്ഛന്‍ അടിച്ചുകൊന്നു. മണ്ട്യസ്വദേശിയും ബംഗ്‌ളൂരു നാഗദേവനഹള്ളിയില്‍ താമസക്കാരനുമായ രാജേഷ് (35) ആണ് കൊല്ലപ്പെട്ടത്. സംഭവത്തില്‍ രാജേഷിന്റെ പിതാവും പാചകവിദഗ്ധനുമായ ലിംഗപ്പ (58)യെ പൊലീസ് അറസ്റ്റു ചെയ്തു. ലോറി ഡ്രൈവറാണ് രാജേഷ്. വൈകുന്നേരം മദ്യലഹരിയിലെത്തുന്ന ഇയാള്‍ ബഹളം വയ്ക്കുന്നത് പതിവാണ്. മദ്യലഹരിയില്‍ വീട്ടിലേയ്ക്ക് വരരുതെന്ന് പല തവണ താക്കീത് നല്‍കിയിരുന്നുവത്രെ. ഇതു വകവയ്ക്കാതെ രാജേഷ് കഴിഞ്ഞ ദിവസവും വീട്ടിലെത്തി ബഹളം വച്ചു. ഇതില്‍ പ്രകോപിതനായ ലിംഗപ്പ മരക്കഷ്ണമെടുത്ത് തലയ്ക്കടിച്ചു വീഴ്ത്തിയ ശേഷം കഴുത്തില്‍ കയര്‍ കുരുക്കി ശ്വാസം മുട്ടിച്ചു കൊലപ്പെടുത്തുകയായിരുന്നുവെന്നാണ് കേസ്. കൊലപാതകത്തിനു ശേഷം വിവരം പ്രതി തന്നെയാണ് പൊലീസിനെ അറിയിച്ചത്.