കാസര്‍കോട്: ബദിയഡുക്കയിലെ ഓട്ടോ ഡ്രൈവറെ ദുരൂഹസാഹചര്യത്തില്‍ കാണാതായി.കന്യപ്പാടി, കര്‍ക്കട്ടപ്പള്ള സ്വദേശിയും ബദിയഡുക്കയിലെ ബന്ധുവീട്ടില്‍ താമസക്കാരനുമായ നിതിന്‍ കുമാറി (29)നെയാണ് കാണാതായത്. 12ന് രാവിലെ പതിവുപോലെ ഓട്ടോയുമായി പോയതായിരുന്നു. ബദിയഡുക്ക മീത്തല്‍ ബസാര്‍ ഓട്ടോ സ്റ്റാന്റിലെ ഡ്രൈവറാണ്. സുഹൃത്തുക്കളും ബന്ധുക്കളും ഫോണില്‍ ബന്ധപ്പെടാന്‍ ശ്രമിച്ചുവെങ്കിലും സ്വിച്ച് ഓഫ് എന്ന മറുപടിയാണ് ലഭിച്ചത്. നിതിന്‍ കുമാറിനെ കണ്ടെത്താനുള്ള അന്വേഷണം തുടരുന്നതിനിടയിലാണ് ഓട്ടോ ബദിയഡുക്ക സി.എച്ച്.സി.ക്കു സമീപത്തു നിര്‍ത്തിയിട്ട നിലയില്‍ കാണപ്പെട്ടത്. തുടര്‍ന്ന് വീട്ടുകാര്‍ പൊലീസില്‍ പരാതി നല്‍കി. പൊലീസ് അന്വേഷണം തുടരുന്നു. നിതിന്‍ കുമാറിനെ കണ്ടെത്തുന്നതിനായി സൈബര്‍ പൊലീസിന്റെ സഹായം തേടിയിട്ടുണ്ട്.
