കണ്ണൂര്‍: വളപട്ടണത്ത് മണല്‍കടത്ത് തടയാന്‍ പോവുകയായിരുന്ന എസ്.ഐ.യെയും പൊലീസുകാരനെയും ടിപ്പര്‍ ലോറി കയറ്റി കൊല്ലാന്‍ ശ്രമം. വളപട്ടണം പൊലീസ് സ്റ്റേഷനിലെ എസ്.ഐ ടി.എം വിപിന്‍, പൊലീസുകാരനായ കിരണ്‍ എന്നിവരാണ് വധശ്രമത്തിനു ഇരയായത്. ഇരുവരും ജില്ലാ ആശുപത്രിയില്‍ ചികിത്സയിലാണ്. വ്യാഴാഴ്ച പുലര്‍ച്ചെ നാലു മണിയോടെയാണ് സംഭവം. മാങ്കടവ്, പാറക്കല്ലില്‍ മണല്‍ കടത്ത് സജീവമാണ്. പൊലീസാണെന്നു അറിയാതിരിക്കുന്നതിനാണ് എസ്.ഐ.യും പൊലീസുകാരനും സ്‌കൂട്ടറില്‍ യാത്ര ചെയ്തത്. എന്നാല്‍ സ്‌കൂട്ടര്‍ യാത്രക്കാര്‍ പൊലീസുകാരാണെന്നു തിരിച്ചറിഞ്ഞതോടെ മണല്‍ കയറ്റിയ ടിപ്പര്‍ ലോറി സ്‌കൂട്ടറില്‍ ഇടിക്കുകയായിരുന്നു. ഇടിയുടെ ആഘാതത്തില്‍ തെറിച്ചുവീണതു കൊണ്ടു മാത്രമാണ് പൊലീസുകാരുടെ ജീവന്‍ രക്ഷപ്പെട്ടത്. കഴിഞ്ഞ ദിവസവും മണല്‍ മാഫിയയുടെ ആക്രമണം ഉണ്ടായ സ്ഥലമാണ് പാറക്കല്ലില്‍. മണല്‍ കടത്തുന്ന വിവരം പൊലീസുകാരെ അറിയിച്ചുവെന്ന് ആരോപിച്ചാണ് അന്ന് രണ്ടു പേരെ ആക്രമിച്ചത്.