കാസര്കോട്: ബദിയഡുക്കയില് പച്ചക്കറി വ്യാപാരിയും ബാര്ബറും തമ്മിലുണ്ടായ വാക്കു തര്ക്കം കൂട്ടത്തല്ലിലും നാലു പേരുടെ പരിക്കിലും കലാശിച്ചു. സംഭവത്തില് ബദിയഡുക്ക പൊലീസ് രണ്ടു കേസുകള് രജിസ്റ്റര് ചെയ്തു.
പരിക്കേറ്റ ബദിയടുക്കയിലെ പച്ചക്കറി വ്യാപാരി ചെടേക്കാലിലെ ഷരീഫ്, ജീവനക്കാരനായ സക്കറിയ എന്നിവരെ ചെങ്കള നായനാര് ആശുപത്രിയിലും ബാര്ബര് ഷോപ്പ് ഉടമ രാജേഷ്, സഹോദരന് രഞ്ജിത്ത് എന്നിവരെ കാസര്കോട് ജനറല് ആശുപത്രിയിലും പ്രവേശിപ്പിച്ചു. തിങ്കളാഴ്ച രാത്രി 9.30 മണിയോടെയാണ് സംഭവം. ഷരീഫും സമീപത്തെ ബാര്ബര് ഷോപ്പ് ഉടമ രാജേഷും തമ്മില് ഉണ്ടായ വാക്കുതര്ക്കത്തേത്തുടര്ന്നാണ് പ്രശ്നം തുടങ്ങിയതെന്ന് പൊലീസ് പറഞ്ഞു. പിന്നീട് സക്കറിയയും രാജേഷിന്റെ സഹോദരനും മറ്റു രണ്ട് പേരും പ്രശ്നത്തില് ഇടപെട്ടതോടെ കൂട്ടത്തല്ലില് കലാശിക്കുകയായിരുന്നുവെന്ന് പൊലീസ് കൂട്ടിച്ചേര്ത്തു. ഷരീഫിന്റെ പരാതിയില് രാജേഷ്, സഹോദരന് രഞ്ജിത്ത്, മുന്ന, ഗിരീഷ് എന്നിവര്ക്കെതിരെയും രാജേഷിന്റെ പരാതിയില് ഷരീഫ്, സക്കറിയ എന്നിവര്ക്കെതിരെയും കേസെടുത്തു.
![](https://mlozaudj56ft.i.optimole.com/w:1670/h:996/q:mauto/f:best/https://malayalam.karavaldaily.com/wp-content/uploads/2024/07/inbound663317320018624884.jpg)