കാസര്കോട്: മഴക്കാലമായാലും, വേനല്ക്കാലമായാലും മഞ്ഞപ്പിത്ത രോഗം പടരുന്നതില് നാട്ടുകാരില് ആശങ്ക. മൊഗ്രാലിലാണ് മഞ്ഞപ്പിത്തം പടരുന്നത്. ഒരു വീട്ടില് തന്നെ ഒന്നിലധികം പേര്ക്ക് മഞ്ഞപ്പിത്ത രോഗലക്ഷണം റിപ്പോര്ട്ട് ചെയ്യപെട്ടതാണ് പ്രദേശത്തെ ആശങ്കപ്പെടുത്തുന്നത്. മൊഗ്രാല് മുഹ്യദ്ധീന് ജുമാ മസ്ജിദിന് സമീപത്തെ അഞ്ചോളം വീടുകളിലാണ് മഞ്ഞപ്പിത്തം റിപ്പോര്ട്ട് ചെയ്യപ്പെട്ടിട്ടുള്ളത്. അതും ഒരു വീട്ടില് ഒന്നിലധികം പേര്ക്ക്. രൂക്ഷമായ വേനല്ക്കാലത്ത് പോലും മൊഗ്രാല് മീലാദ് നഗറിലും, ശാഫി ജുമാമസ്ജിദ് പരിസരത്തും പത്തോളം വീടുകളില് മഞ്ഞപ്പിത്തം കണ്ടെത്തിയിരുന്നു. മഴക്കാലത്തും ഇത്തരത്തില് രോഗലക്ഷണങ്ങള് റിപ്പോര്ട്ട് ചെയ്യുന്നതാണ് നാട്ടുകാരെ ആശങ്കപ്പെടുത്തുന്നത്.
രോഗം മറ്റുള്ള പ്രദേശങ്ങളിലേക്കും പടരാതിരിക്കാന് ആവശ്യമായ നടപടി ആരോഗ്യവകുപ്പിന്റെ ഭാഗത്തുനിന്നുണ്ടാകണമെന്ന് മൊഗ്രാല് ദേശീയവേദി ആവശ്യപ്പെട്ടു. മഞ്ഞപ്പിത്തം പടരുന്നത് കുമ്പള സാമൂഹികാരോഗ്യ കേന്ദ്രം ആരോഗ്യ വകുപ്പ് ഉദ്യോഗസ്ഥരെ ധരിപ്പിച്ചിട്ടുണ്ടെന്ന് വാര്ഡ് മെമ്പര് റിയാസ് മൊഗ്രാലും, മൊഗ്രാല് ദേശീയവേദി ഭാരവാഹികളും അറിയിച്ചു.
![](https://mlozaudj56ft.i.optimole.com/w:1373/h:773/q:mauto/f:best/https://malayalam.karavaldaily.com/wp-content/uploads/2024/07/arrest-anas.jpg)