മംഗ്‌ളൂരു: തേങ്ങ തലയില്‍ വീണ് അഞ്ചു വയസുകാരന് ദാരുണാന്ത്യം. ബ്രഹ്‌മാവാര്‍, ഹെരാഞ്ചയിലാണ് സംഭവം. പ്രശാന്ത് പൂജാരി-സുചിത്ര ദമ്പതികളുടെ രണ്ടാമത്തെ മകനായ ദക്ഷ് (അഞ്ച്)ആണ് മരിച്ചത്. അമ്മയുടെ വിരല്‍തുമ്പില്‍ പിടിച്ച് സ്‌കൂള്‍ ബസില്‍ കയറാന്‍ പോവുകയായിരുന്നു ദക്ഷ്. ഇതിനിടയില്‍ 40 അടി ഉയരമുള്ള തെങ്ങില്‍ നിന്നു തേങ്ങ അടര്‍ന്ന് കുട്ടിയുടെ തലയിലേക്ക് വീഴുകയായിരുന്നു. തലയ്ക്ക് ഗുരുതരമായി പരിക്കേറ്റ കുട്ടിയെ ഉടന്‍ മണിപ്പാള്‍ കെഎംസി ആശുപത്രിയില്‍ എത്തിച്ചു. തലച്ചോറിനു ഗുരുതരമായി പരിക്കേറ്റതിനാല്‍ അടിയന്തിര ശസ്ത്രക്രിയക്ക് വിധേയനാക്കിയെങ്കിലും കുട്ടിയെ രക്ഷിക്കാനായില്ല. കുട്ടിയുടെ ദാരുണമരണം നാടിനെ കണ്ണീരിലാഴ്ത്തി.