തിരുവനന്തപുരം: ക്ഷേത്രോത്സവത്തിനിടെ എസ്.ഐയെ മര്ദിച്ചതായി പരാതി. സംഭവത്തില് സിപിഎം വെളളറട ലോക്കല് സെക്രട്ടറി ഉള്പ്പെടെ മൂന്നുപേര്ക്കെതിരെ പൊലീസ് കേസെടുത്തു. വെളളറട എസ്ഐ അഭിജിത്തിനാണ് മര്ദനമേറ്റത്. അഭിജിത്തിന്റെ പരാതിയില് ലോക്കല് സെക്രട്ടറി പ്രദീപിനും മറ്റ് രണ്ടുപേര്ക്കുമെതിരെയാണ് പൊലീസ് കേസെടുത്തത്. ഞായറാഴ്ച രാത്രി ഒമ്പത് മണിയോടെയാണ് സംഭവം.
വെളളറടയില് ചൂണ്ടിക്കല് ക്ഷേത്രോത്സവത്തിലെ ഘോഷയാത്ര ജംഗ്ഷനിലെത്തിയപ്പോള് സിപിഎം വെളളറട ലോക്കല് സെക്രട്ടറിയുള്പ്പെടെയുള്ള സംഘം നൃത്തം ചെയ്യുന്നത് ഗതാഗതക്കുരുക്കുണ്ടാക്കിയിരുന്നു. ഇവിടെ നിന്ന് മാറി നില്ക്കാന് ആവശ്യപ്പെട്ടതോടെ ഇവര് പ്രകോപിതരായി മര്ദിക്കുകയായിരുന്നുവെന്നാണ് പരാതി. ചികിത്സ തേടാന് അനുവദിച്ചില്ലെന്നും പരാതിയില് പറയുന്നു.
