കാസര്കോട്: ബോംബെ സിനിമയുടെ മുപ്പതാം വാര്ഷികാഘോഷത്തിനായി വിഖ്യാത ചലച്ചിത്ര പ്രവര്ത്തകരായ മണി രത്നവും മനീഷ കൊയ്രാളയും ശനിയാഴ്ച രാവിലെ ബേക്കല് കോട്ടയില് എത്തി. പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ് ഇരുവരെയും സ്വീകരിച്ചു.
30 വര്ഷം മുമ്പ് ഷൈലാബാനുവായി അഭിനയിച്ച കോട്ടക്കൊത്തളങ്ങളില് മനീഷ കൊയ്രാള വീണ്ടും കാലുകുത്തിയപ്പോള് അത് ചരിത്ര നിമിഷമായി മാറി. ‘ഉയിരേ…’ എന്നു തുടങ്ങുന്ന നിത്യഹരിത ഗാനത്തിനൊപ്പം അഭിനയിച്ചതിന്റെ ഓര്മ്മകള് മനീഷ കൊയ്രാളെയെയും സംവിധായകന് മണിരത്നത്തെയും 30 വര്ഷങ്ങള്ക്കു പിന്നിലേയ്ക്ക് കൊണ്ടുപോയി.
തളങ്കരയുടെ സൗന്ദര്യവും മണിരത്നം ബോംബെ സിനിമയില് പ്രയോജനപ്പെടുത്തിയിരുന്നു. അരവിന്ദ് സ്വാമി അവതരിപ്പിച്ച ശേഖറിന്റെയും മനീഷ കൊയ്രാള അഭിനയിച്ച ഷൈലാബാനുവിന്റെയും വീടും ട്രെയിന് ഇറങ്ങി വരുന്ന നായകന്, തോണി ഇറങ്ങിവരുന്ന നായികയെ ആദ്യം കാണുന്നതുമായ രംഗങ്ങള് ചിത്രീകരിച്ചതും തളങ്കരയിലായിരുന്നു.
ശനിയാഴ്ച വൈകുന്നേരം മന്ത്രി പി എ മുഹമ്മദ് റിയാസ് ഉദ്ഘാടനം ചെയ്യുന്ന ബേക്കല് ബീച്ച് ഫെസ്റ്റില് മണി രത്നവും മനീഷ കൊയ്രാളയും മുഖ്യാതിഥികള് ആയിരിക്കും.
