കോട്ടയം: മലയാളി സ്ത്രീയെ തമിഴ്നാട്ടില്‍ തീപ്പൊള്ളലേറ്റ് മരിച്ച നിലയില്‍ കണ്ടെത്തി. വാല്‍പ്പാറയില്‍ ശനിയാഴ്ച രാവിലെ ഏഴരയോടെയാണ് സംഭവം. ഇടിആര്‍ എസ്റ്റേറ്റിലെ മാനേജറും കോട്ടയം സ്വദേശിയുമായ ഗ്രീസിന്റെ ഭാര്യ ഇന്ദുമതി(48) ആണ് മരിച്ചത്. മണ്ണെണ്ണ ഒഴിച്ച് തീകൊളുത്തി മരിച്ച നിലയില്‍ എസ്റ്റേറ്റിലെ വീടിനുള്ളിലാണ് കണ്ടെത്തിയത്. ഗ്രീസ് എസ്റ്റേറ്റിലേക്ക് പോയതിന് പിന്നാലെയാണ് സംഭവം ഉണ്ടായതെന്നാണ് വിവരം. വീട്ടില്‍ നിന്ന് തീ ഉയരുന്നത് കണ്ട് അയല്‍വാസി എത്തിയപ്പോഴേക്കും ഇന്ദുമതി മരിച്ചിരുന്നു. മൃതദേഹം വാല്‍പ്പാറ സര്‍ക്കാര്‍ ആശുപത്രിയിലേക്ക് മാറ്റി. സംഭവത്തില്‍ വാല്‍പ്പാറ പൊലീസ് അന്വേഷണം ആരംഭിച്ചു.