കാസര്‍കോട്: അറവു മാലിന്യങ്ങള്‍ അടങ്ങിയ മലിനജലം റോഡിലേക്ക് ഒഴുക്കിയ സംഭവത്തില്‍ ആദൂര്‍ പൊലീസ് സ്വമേധയാ കേസെടുത്തു. ദേലംപാടി, മയ്യള ഹൗസിലെ കെ.എം ജലാലുദ്ദീ(30)നെതിരെയാണ് ആദൂര്‍ എസ്.ഐ കെ.വിനോദ് കുമാര്‍ കേസെടുത്തത്.
ഞായറാഴ്ച ഉച്ചക്ക് 1.30 മണിയോടെയാണ് കേസിനാസ്പദമായ സംഭവം. പോത്തുകളെ വളര്‍ത്തുന്ന തൊഴുത്തില്‍ നിന്നു മലിന ജലം റോഡിലേക്ക് ഒഴുക്കുന്നതായും തൊഴുത്തിനു സമീപത്തെ കുഴിയില്‍ പോത്തിന്റെ തലയും തോലും കുടലും നിക്ഷേപിച്ചിട്ടുള്ളതായും ഉള്ള വിവരം ലഭിച്ചതിനെ തുടര്‍ന്നാണ് എസ്.ഐയും സംഘവും സ്ഥലത്തെത്തിയത്. മലിനജലം ഒഴുക്കിയതുമൂലം സമീപത്തുള്ള കിണറുകള്‍, കുളങ്ങള്‍ എന്നിവയിലെ ജലം മലിനപ്പെടാന്‍ സാധ്യതയുണ്ടെന്നു ബോധ്യപ്പെട്ടതിന്റെ അടിസ്ഥാനത്തിലാണ് സ്വമേധയാ കേസെടുത്തതെന്നു പറയുന്നു.
