കാസര്‍കോട്: കുറ്റിക്കോല്‍, പള്ളഞ്ചിയില്‍ തവള പാമ്പിനെ വിഴുങ്ങി! കഴിഞ്ഞ ദിവസം രാത്രി ഏഴരമണിയോടെയാണ് അപൂര്‍വ്വ സംഭവം നടന്നത്. പനത്തടി കൃഷിഭവനിലെ കൃഷി അസിസ്റ്റന്റും കര്‍ഷകനുമായ സി. ചക്രപാണിയാണ് ഈ അപൂര്‍വ്വ കാഴ്ച കണ്ടത്. തോട്ടത്തില്‍ വെള്ളം തളിക്കാന്‍ എത്തിയതായിരുന്നു ചക്രപാണി. ഈ സമയത്താണ് പഴയ കുളത്തിന്റെ പടവില്‍ ഇരുന്നു തവളയാശാന്‍ പാമ്പിനെ വിഴുങ്ങുന്നത് കണ്ടത്. പണി കഴിഞ്ഞ് വീട്ടില്‍ എത്തിയ ചക്രപാണി സംഭവം പറഞ്ഞപ്പോള്‍ വീട്ടുകാര്‍ പോലും വിശ്വസിച്ചില്ല. ഇതോടെ മൊബൈല്‍ ഫോണുമായി കുളത്തിനു സമീപത്തെത്തി ചിത്രം പകര്‍ത്തി. ചിത്രം കണ്ടതോടെ വീട്ടുകാര്‍ മൂക്കത്തു വിരല്‍ വച്ചു. എന്നാല്‍ ഏതിനം പാമ്പിനെയാണ് വിഴുങ്ങിയതെന്നു വ്യക്തമല്ല.