പി.പി ചെറിയാന്‍
വാഷിംഗ്ടണ്‍ ഡി സി:ഗ്രീസിലെ യുഎസ് അംബാസഡറായി മുന്‍ ഫോക്സ് ന്യൂസ് അവതാരക കിംബര്‍ലി ഗില്‍ഫോയിലിനെ ട്രംപ് നോമിനേറ്റ് ചെയ്തു. ഗില്‍ഫോയിലിന്റെ നാമനിര്‍ദ്ദേശത്തിന് സെനറ്റ് സ്ഥിരീകരണം ആവശ്യമാണ്.
2020-ല്‍ ട്രംപിന്റെ മകന്‍ ഡൊണാള്‍ഡ് ട്രംപ് ജൂനിയറുമായി വിവാഹനിശ്ചയം കഴിഞ്ഞിരുന്ന ഗില്‍ഫോയ്ല്‍ ട്രംപിന്റെ പ്രചാരണ ഫണ്ട് ശേഖരണ ചുമതയിലും പ്രവര്‍ത്തിച്ചിട്ടുണ്ട്. വിദേശ നയത്തിലോ നയതന്ത്രപരമായ റോളിലോ അവര്‍ സേവനമനുഷ്ഠിച്ചിട്ടില്ല, ടെലിവിഷനിലെ ഒരു കരിയറിലേക്ക് മാറുന്നതിന് മുമ്പ് കാലിഫോര്‍ണിയയില്‍ പ്രോസിക്യൂട്ടറായി ജോലി ചെയ്തു.
”വര്‍ഷങ്ങളായി കിംബര്‍ലി ഒരു അടുത്ത സുഹൃത്താണ്,” ട്രംപ് പ്രസ്താവനയില്‍ എഴുതി. ‘ഗ്രീസുമായി ശക്തമായ ഉഭയകക്ഷി ബന്ധം വളര്‍ത്തിയെടുക്കുന്നതിനും പ്രതിരോധ സഹകരണം മുതല്‍ വ്യാപാരം, സാമ്പത്തിക നവീകരണം വരെയുള്ള വിഷയങ്ങളില്‍ ഞങ്ങളുടെ താല്‍പ്പര്യങ്ങള്‍ മുന്നോട്ട് കൊണ്ടുപോകുന്നതിനും കിംബര്‍ലി തികച്ചും അനുയോജ്യമാണ്.
‘ഗ്രീസിലെ അടുത്ത അംബാസഡറായി പ്രവര്‍ത്തിക്കാനുള്ള പ്രസിഡന്റ് ട്രംപിന്റെ നാമനിര്‍ദ്ദേശം അംഗീകരിക്കുന്നതില്‍ തനിക്ക് ബഹുമതിയുണ്ടെന്നും യുഎസ് സെനറ്റിന്റെ പിന്തുണ നേടാന്‍ ആഗ്രഹിക്കുന്നുവെന്നും.’ഗില്‍ഫോയില്‍ സോഷ്യല്‍ മീഡിയയില്‍ കുറിച്ചു. അതേ സമയം പ്രസിഡന്റ് സ്ഥാനത്തേക്കു തിരഞ്ഞെടുക്കപ്പെട്ട ട്രംപ് തന്റെ ഭരണം വിശ്വസ്തരെയും ദാതാക്കളെയും കുടുംബാംഗങ്ങളെയും കൊണ്ട് നിറയ്ക്കുകയാണെന്നു ആക്ഷേപമുയരുന്നുണ്ട്. ഫ്രാന്‍സിലെ അംബാസഡറായി മരുമകന്റെ പിതാവ് ചാള്‍സ് കുഷ്നറെയും മിഡില്‍ ഈസ്റ്റ് ഉപദേശകനായി മകള്‍ ടിഫാനി ട്രംപിന്റെ അമ്മായിയപ്പന്‍ മസാദ് ബൗലോസിനെയും ട്രംപ് തിരഞ്ഞെടുത്തിട്ടുണ്ട്.
