മേപ്പാടി ഉരുള്പൊട്ടലില് മരണസംഖ്യ ഉയരുന്നു. ഇഇതുവരെ 57 പേരുടെ മരണം സ്ഥിരീകരിച്ചു.
നിലമ്പൂര് പോത്തുകല്ല് ഭാഗത്ത് പുഴയില് പലയിടങ്ങളില് നിന്നായി ലഭിച്ച നിരവധി പേരുടെ മൃതദേഹങ്ങള് ഉള്പ്പെടെയുള്ള കണക്കാണിത്. മരണസംഖ്യ ഇനിയും ഉയരാന് സാധ്യതയുണ്ടെന്നാണ് വിവരം.
പൊലീസിന്റെ ഡ്രോണുകള് വിന്യസിച്ച് തിരിച്ചില് നടത്താന് മുഖ്യമന്ത്രി നിര്ദേശം നല്കിയിട്ടുണ്ട്. രക്ഷാപ്രവര്ത്തനത്തിന് ഡോഗ് സ്ക്വാഡും രംഗത്തിറങ്ങും. പലയിടങ്ങളിലായി 1000 ലേറെ പേര് കുടുങ്ങിക്കിടക്കുന്നതായാണ് വിവരം. മുണ്ടക്കൈ ട്രീവാലി റിസോര്ട്ടില് നാട്ടുകാരായ നൂറിലധികം പേരാണ് കുടുങ്ങിക്കിടക്കുന്നത്. കുടുങ്ങിയവരില് വിദേശികളും ഉള്പ്പെടുന്നുണ്ട്.
രക്ഷാപ്രവര്ത്തനത്തിനായി ഏഴിമലയില് നിന്ന് നാവിക സേനാ സംഘം എത്തും. മുഖ്യമന്ത്രിയുടെ നിര്ദ്ദേശ പ്രകാരമാണ് നേവിയുടെ സഹായം അഭ്യര്ത്ഥിച്ചത്. നേവിയുടെ റിവര് ക്രോസിംഗ് ടീമിന്റെ സഹായം ആണ് അഭ്യര്ത്ഥിച്ചത്. ഏഴിമല നാവിക അക്കാദമിയിലെ നേവിയുടെ സംഘം വയനാട്ടിലേക്ക് തിരിച്ചു. കണ്ണൂരില് നിന്നും കോഴിക്കോട് നിന്നും കണ്ണൂര് നിന്നും ദുരന്തബാധിത മേഖലയിലേക്ക് സൈന്യമെത്തുന്നു. കുടുങ്ങിക്കിടക്കുന്നവരെ പുറത്തെത്തിക്കുക എന്നതാണ് പ്രധാന ദൗത്യമെന്ന് സൈന്യം വ്യക്തമാക്കി. രക്ഷാദൗത്യത്തിന് തടസ്സമായി കനത്ത മഴ പെയ്യുകയാണ്.
മുണ്ടക്കൈ, അട്ടമല, ചൂരല്മല എന്നിവിടങ്ങളിലാണ് ചൊവ്വാവ്ച രാവിലെ 2 മണിയോടെയാണ് ദുരന്തമുണ്ടായത്. മരിച്ചവരില് 3 കുട്ടികളും ഉള്പ്പെടുന്നുണ്ട്. മുണ്ടക്കൈയും അട്ടമലയും പൂര്ണമായി ഒറ്റപ്പെട്ട നിലയിലാണ്. ഇരുമേഖലകളിലുമായി നാനൂറോളം കുടുംബങ്ങളാണ് ഒറ്റപ്പെട്ട് പോയിരിക്കുന്നത്. 70 തിലധികം വീടുകല് തകര്ന്നിട്ടുണ്ട്. ഉറ്റവരെ കാണാതെ വിഷമിച്ചുകരയുന്നവരുടെ നൊമ്പര കാഴ്ചയാണ് ഓരോ ആശുപത്രിക്ക് മുന്നിലും.
