കാസർകോട്: മംഗൽപ്പാടി ഷിറിയ പുതിയങ്ങാടിയിൽ കോഴിക്കൂട്ടിൽ കയറിയ പെരുമ്പാമ്പ് അഞ്ച് കോഴികളെ കൊന്നു. ഇതിൽ രണ്ട് കോഴികളെ പെരുമ്പാമ്പ് ഭക്ഷിച്ച നിലയിലും മൂന്ന് കോഴികളെ കൊന്ന നിലയിലുമാണ് കണ്ടെത്തിയത്. പുതിയങ്ങാടിയിലെ ആലിക്കുഞ്ഞിയുടെ വീട്ടിലെ കോഴികളെയാണ് പെരുമ്പാമ്പ് ആക്രമിച്ചത്. ഏകദേശം അഞ്ച് കിലോ തൂക്കമുള്ള മുട്ടക്കോഴികളെയാണ് കൊന്നത്. വീടിനോട് ചേർന്ന് മരം ഉപയോഗിച്ച് നിർമിച്ച കോഴിക്കൂട്ടിനുള്ളിലാണ് പെരുമ്പാമ്പ് കയറിയത്. വിവരമറിഞ്ഞതിനെ തുടർന്ന് പാമ്പുപിടിത്തക്കാരൻ ചേവാറിലെ ഉബൈദ് മുസ്ലിയാർ സ്ഥലത്തെത്തി. പെരുമ്പാമ്പിനെ പിടികൂടി കാട്ടിൽ വിട്ടയച്ചു.