കാസര്‍കോട്: മൊബൈല്‍ ഫോണില്‍ കടമായി റീചാര്‍ജ്ജ് ചെയ്യാന്‍ വിസമ്മതിച്ച കടയുടമയെ ഇരുമ്പു വടി കൊണ്ട് തലക്കടിച്ചു. അക്രമിയെ നരഹത്യാശ്രമത്തിനു കേസെടുത്തു അറസ്റ്റ് ചെയ്തു. കൂടാല്‍ മേര്‍ക്കള, കുണ്ടങ്കേരടുക്കയിലെ മൊബൈല്‍ ഫോണ്‍ ഷോപ്പുടമ അബ്ദുല്‍ റിയാസി(30)നെയാണ് ചൊവ്വാഴ്ച വൈകിട്ട് അക്രമിച്ചത്. പണം നല്‍കിയാല്‍ മാത്രമേ റീചാര്‍ജ്ജ് ചെയ്യാന്‍ കഴിയൂവെന്നു തീര്‍ത്തു പറഞ്ഞപ്പോള്‍ ഇരുമ്പു വടി കൊണ്ട് തലക്കടിക്കുകയായിരുന്നുവെന്നു പരിക്കേറ്റ് ബന്തിയോട്ടെ ആശുപത്രിയില്‍ കഴിയുന്ന അബ്ദുല്‍ റിയാസ് പൊലീസിനു മൊഴി നല്‍കി. പ്രതിയായ ഇച്ചിലങ്കോട്ടെ മുഹമ്മദ് ഷറഫുദ്ദീന്‍ എന്ന ഷറഫു (30)വിനെ കുമ്പള ക്രൈം എസ്.ഐ വി.കെ വിജയനാണ് അറസ്റ്റു ചെയ്തത്. പ്രതിയെ കോടതി രണ്ടാഴ്ചത്തേക്ക് റിമാന്റു ചെയ്തു.