കോട്ടയം: ഗൂഗിള്‍ മാപ്പ് നോക്കി യാത്ര ചെയ്ത സംഘം സഞ്ചരിച്ച കാര്‍ തോട്ടില്‍ വീണു. സ്ത്രീയടക്കമുള്ള നാലു പേരെയും പൊലീസും നാട്ടുകാരും ചേര്‍ന്ന് അല്‍ഭുതകരമായി രക്ഷപ്പെടുത്തി. തോട്ടില്‍ മുങ്ങിയ കാര്‍ വീണ്ടെടുക്കാനുള്ള ശ്രമം തുടരുന്നു. ശനിയാഴ്ച പുലര്‍ച്ചെ മൂന്നു മണിയോടെ കുറുപ്പുന്തറ, കടവുപാലത്തിന് സമീപത്താണ് അപകടം ഉണ്ടായത്. ഹൈദരാബാദ് സ്വദേശികളായ ഒരു സ്ത്രീയും മൂന്നു പുരുഷന്മാരുമാണ് കാറില്‍ ഉണ്ടായിരുന്നത്. ഇവര്‍ മൂന്നാറില്‍ നിന്നു ആലപ്പുഴയിലേക്ക് പോകുന്നതിനിടയിലാണ് അപകടത്തില്‍പെട്ടത്. ബഹളം കേട്ട് പരിസരവാസികളാണ് ആദ്യം രക്ഷാപ്രവര്‍ത്തനം ആരംഭിച്ചത്. പിന്നീട് പട്രോളിംഗ് നടത്തുകയായിരുന്ന പൊലീസ് സംഘവും രക്ഷാപ്രവര്‍ത്തനത്തില്‍ പങ്കെടുത്തു.