പുത്തൂര്‍: കേരള- കര്‍ണ്ണാടക അതിര്‍ത്തി പ്രദേശമായ ഈശ്വരമംഗലം സ്വദേശിനിയെ പുത്തൂരില്‍ കഴുത്തറുത്തു കൊന്നു. കൃത്യത്തിനു ശേഷം കൊലക്കത്തികൊണ്ട് സ്വയം കഴുത്തു മുറിച്ച് ആത്മഹത്യയ്ക്കു ശ്രമിച്ച ഭര്‍ത്താവിനെ അതീവ ഗുരുതരനിലയില്‍ മംഗ്‌ളൂരുവിലെ ആശുപത്രിയില്‍ പ്രവേശിപ്പിച്ചു. പുത്തൂര്‍, അരിയടുക്ക, കട്ടത്തെരു, ഗോള്‍ത്തിലയിലെ പുരുഷോത്തമ എന്ന ബൈര (50)യുടെ ഭാര്യ ഈശ്വര മംഗലം സ്വദേശിനി സാവിത്രി (42)യാണ് അതിദാരുണമായി കൊല്ലപ്പെട്ടത്. കഴിഞ്ഞ ദിവസമാണ് നാടിനെ നടുക്കിയ കൊലപാതകവും ആത്മഹത്യാശ്രമവും അരങ്ങേറിയത്.
ഇരുവരും തമ്മില്‍ ദാമ്പത്യ പ്രശ്‌നങ്ങള്‍ നിലവില്‍ ഉണ്ടായിരുന്നതായി പറയുന്നു. കഴിഞ്ഞ ദിവസം ഇരുവരും തമ്മില്‍ വാക്കേറ്റമുണ്ടാവുകയും ഇതിനിടയില്‍ പ്രകോപിതനായ പുരുഷോത്തമ കത്തിയെടുത്ത് ഭാര്യയുടെ കഴുത്തറുക്കുകയായിരുന്നുവത്രെ. ബഹളം കേട്ട് അയല്‍വാസികള്‍ ഓടിക്കൂടുന്നതിനിടയില്‍ പുരുഷോത്തമ, ഭാര്യയെ കൊലപ്പെടുത്താന്‍ ഉപയോഗിച്ച കത്തികൊണ്ട് സ്വന്തം കഴുത്തില്‍ മുറിവേല്‍പ്പിക്കുകയായിരുന്നു. ഇരുവരെയും ഉടന്‍ പുത്തൂരിലെ ആശുപത്രിയില്‍ എത്തിച്ചുവെങ്കിലും സാവിത്രിയെ രക്ഷിക്കാന്‍ കഴിഞ്ഞില്ല.
സംഭവത്തില്‍ പുത്തൂര്‍ റൂറല്‍ പൊലീസ് കേസെടുത്ത് അന്വേഷണം തുടങ്ങി.