കൊച്ചി: പുതുവത്സര ആഘോഷങ്ങളുടെ ഭാഗമായി ഫോര്‍ട്ട് കൊച്ചിയില്‍ ഇത്തവണ ഒരുക്കിയിരിക്കുന്നത് രണ്ട് കൂറ്റന്‍ പപ്പാഞ്ഞികളെ. ഗലാ ഡി. ഫോര്‍ട്ട് കൊച്ചി എന്ന സംഘടനയുടെ നേതൃത്വത്തില്‍ വെളി മൈതാനത്ത് 55 അടി ഉയരത്തിലുള്ള പപ്പാഞ്ഞികളെയാണ് തയാറാക്കിയിട്ടുള്ളത്. നടന്‍ ഷെയിന്‍ നിഗം പപ്പാഞ്ഞിയുടെ ഉദ്ഘാടനം നിര്‍വഹിച്ചു.

വിവിധ ക്ലബ്ബുകളുടെ നേതൃത്വത്തില്‍ വിവിധ ആകൃതിയിലുള്ള മറ്റ് നൂറോളം പപ്പാഞ്ഞികളും ഒരുങ്ങുന്നുണ്ട്. കൊച്ചു കുട്ടികള്‍ വരെ സംഘം ചേര്‍ന്ന് മിക്ക ഇടവഴികളിലും പപ്പാഞ്ഞി രൂപങ്ങള്‍ ഒരുക്കുന്നതും കൗതുകം പകരുന്ന കാഴ്ചയാണ്. 31 ന് അര്‍ദ്ധ രാത്രി പാപ്പാഞ്ഞികള്‍ അഗ്നിക്കിരയാക്കും.

കൊച്ചിന്‍ കാര്‍ണിവല്‍ ഒരുക്കങ്ങളും പൂര്‍ത്തിയായതായി കൊച്ചി സിറ്റി പൊലീസ് കമ്മീഷണര്‍ പുട്ട വിമലാദിത്യ അറിയിച്ചു. സുരക്ഷയ്ക്കായി 13 ഡി.വൈ.എസ്.പിമാര്‍, 28 ഇന്‍സ്പെക്ടര്‍മാര്‍, 1200 പൊലീസുകാര്‍ എന്നിവരെയും നിയോഗിച്ചിട്ടുണ്ട്. പരേഡ്, വേളി ഗ്രൗണ്ടുകളില്‍ പാര്‍ക്കിംഗ് ഉണ്ടാകില്ല. ഡിസംബര്‍ 31 ന് ഉച്ചക്ക് രണ്ടു മണി മുതല്‍ ഫോര്‍ട്ട് കൊച്ചിയിലേക്ക് വാഹനം വിടില്ല. ഫോര്‍ട്ട് കൊച്ചി സ്വദേശികളുടെ വാഹനങ്ങളും കടത്തിവിടില്ല.

വൈപ്പിന്‍ – ഫോര്‍ട്ട് കൊച്ചി റോറോയില്‍ വാഹനങ്ങള്‍ 4 മണി വരെ മാത്രമേ കയറാന്‍ അനുവദിക്കൂ. 7 മണി വരെ ആളുകളെ റോ റോയില്‍ അനുവദിക്കും. പരമാവധി സ്വകാര്യ വാഹനങ്ങള്‍ ഒഴിവാക്കി പൊതുഗതാഗത സൗകര്യങ്ങള്‍ ഉപയോഗിക്കണം. കൊച്ചി സിറ്റി മേഖല ഡ്രോണ്‍ നിരോധിത മേഖലയായി പ്രഖ്യാപിച്ചു. റെഡ് സോണില്‍ ഡ്രോണ്‍ ഉപയോഗിച്ചാല്‍ നടപടി എടുക്കും. ആവശ്യത്തിന് വെളിച്ചത്തിനുള്ള സജ്ജീകരണം എല്ലായിടത്തും ഒരുക്കിയിട്ടുണ്ട്.

വൈപ്പിന്‍ ഭാഗത്തും, സിറ്റിയിലേക്കും ആഘോഷങ്ങള്‍ക്ക് ശേഷം ബസ് സൗകര്യം ഉണ്ടായിരിക്കും. വൈപ്പിന്‍ ജെട്ടിയിലേക്ക് 4 മണിക്ക് ശേഷം വാഹനങ്ങള്‍ നിരോധിച്ചു. 28 പാര്‍ക്കിംഗ് ഗ്രൗണ്ടുകള്‍ ഉണ്ടാകും. രാത്രി 2 മണി വരെ മെട്രോ സര്‍വീസ് നടത്തും. വാട്ടര്‍ മെട്രോ രാവിലെ 4 മണി വരെ ഉണ്ടാകും, ആവശ്യം വന്നാല്‍ സമയം നീട്ടുമെന്നും അധികൃതര്‍ അറിയിച്ചു. കൊച്ചി മെട്രോ ഫീഡര്‍ ബസ് ഉപയോഗപ്പെടുത്തണമെന്നും കമ്മീഷണര്‍ അറിയിച്ചു.