മംഗളൂരു:വിദ്യാര്ത്ഥികളുടെ എണ്ണം കുറവായതിനാല് മംഗളൂരു സര്വകലാശാലയുമായി അഫിലിയേറ്റ് ചെയ്ത 22 സ്വകാര്യ കോളേജുകള് അടച്ചുപൂട്ടാന് അക്കാദമിക് കൗണ്സില് തീരുമാനിച്ചു. വൈസ് ചാന്സലര് പ്രൊഫ. പി.എല്. ധര്മ്മയുടെ അധ്യക്ഷതയില് ചേര്ന്ന അക്കാദമിക് കൗണ്സിലിന്റെ ഓണ്ലൈന് യോഗത്തിലാണ് ഈ നിര്ണായക തീരുമാനം.
ഈ കോളേജുകള് അടുത്ത അധ്യയന വര്ഷം മുതല് വിദ്യാര്ത്ഥികളെ പ്രവേശിപ്പിക്കുന്നത് നിര്ത്തും. എന്നാല് നിലവിലെ വിദ്യാര്ത്ഥികളെ അവരുടെ കോഴ്സുകള് തടസ്സമില്ലാതെ പൂര്ത്തിയാക്കാന് അനുവദിക്കും.
അടച്ചു പൂട്ടുന്ന കോളേജുകള്:
എബിഎ വിമന്സ് ഫസ്റ്റ് ഗ്രേഡ് കോളേജ് സൂറത്കല്,,അഞ്ജുമാന് ഫസ്റ്റ് ഗ്രേഡ് കോളേജ് മംഗളൂരു,,അമൃത് കോളേജ് പടില്,,സിലിക്കണ് കോളേജ് ഓഫ് അഡ്വാന്സ്ഡ് സ്റ്റഡീസ് കൊഞ്ചാടി, മോഗ്ലിംഗ് ഇന്സ്റ്റിറ്റ്യൂട്ട് ഓഫ് ജര്മ്മന് ലാംഗ്വേജ് ബല്മട്ട,,സാര്സ് കോളേജ് ഓഫ് ആര്ട്സ് ആന്ഡ് സയന്സ് മംഗളൂരു, റൊസാരിയോ കോളേജ് ഓഫ് മാനേജ്മെന്റ് സ്റ്റഡീസ് ബോലാര്, കരാവലി കോളേജ് ഓഫ് എഡ്യൂക്കേഷന്, പ്രേംകാന്തി കോളേജ് ഓഫ് എഡ്യൂക്കേഷന്,സാപ്പിയന്റ് ബഥനി ഫസ്റ്റ് ഗ്രേഡ് കോളേജ് നെല്യാടി, ശാരദ വിമന്സ് കോളേജ് സുള്ള്യ, രാംകുഞ്ചേശ്വര് കോളേജ്, ഹസ്രത്ത് സയ്യദ് മദനി വിമന്സ് കോളേജ് ഉള്ളാള്, സെന്റ് സെബാസ്റ്റ്യന് കോളേജ് ഓഫ് കൊമേഴ്സ് ബെല്ത്തങ്ങാടി, സെന്റ് തോമസ് കോളേജ്,മാര് ഇവാനിയോസ് കോളേജ് കടബ, മാധവ പൈ കോളേജ് മണിപ്പാല്, മൂകാംബിക ഫസ്റ്റ് ഗ്രേഡ് കോളേജ് ബൈന്ദൂര്,വാരസിദ്ധി വിനായക ഫസ്റ്റ് ഗ്രേഡ് കോളേജ് കുന്താപുരം, ബി ഡി ഷെട്ടി കോളേജ് ഓഫ് ബിസിനസ് മാനേജ്മെന്റ് ഈറോഡി ഉഡുപ്പി, വിദ്യാനികേതന് ഫസ്റ്റ് ഗ്രേഡ് കോളേജ് കാപ്പു, കൃഷ്ണഭായ് വാസുദേവ് ഷേണായി മെമ്മോറിയല് കോളേജ് കാട്പാടി.
അറബി ഭാഷ പഠന കേന്ദ്രത്തിന് അനുമതി
അറബി ഭാഷാ ഗവേഷണത്തിനും പഠനത്തിനുമായി അറബിക് പഠന കേന്ദ്രം സ്ഥാപിക്കുന്നതിനുള്ള ഗവര്ണറുടെ അംഗീകാരം സര്വകലാശാലക്ക് ലഭിച്ചു. ദക്ഷിണ കന്നട, കുടക് ജില്ലകളിലെ പ്രാദേശിക അറബി ഭാഷകള്, പ്രാദേശിക സംസ്കാരം, സമൂഹങ്ങള് എന്നിവയില് ഈ കേന്ദ്രം ശ്രദ്ധ കേന്ദ്രീകരിക്കുമെന്ന് വൈസ് ചാന്സലര് പറഞ്ഞു.
ബിഎ ഇക്കണോമിക്സ് പ്രോഗ്രാമിന്റെ നാലാം സെമസ്റ്ററിനായി അക്കാദമിക് കൗണ്സില് നൈപുണ്യ അധിഷ്ഠിത കോഴ്സുകള്ക്ക് അംഗീകാരം നല്കി.
ബിഎ ജേണലിസം പ്രോഗ്രാമിന്റെ മൂന്നാമത്തെയും നാലാമത്തെയും സെമസ്റ്ററുകള്ക്ക് ഇലക്റ്റീവ് കോഴ്സുകള്ക്ക് അംഗീകാരം നല്കി.
പുതിയ ഡോക്ടറല് പ്രോഗ്രാമുകള് ആരംഭിക്കുന്നതിനായി എല്ലാ ഡീനുകളും തയ്യാറാക്കിയ ഒരു പുതുക്കിയ പിഎച്ച്ഡി പ്രോഗ്രാമിന്റെ മാര്ഗ്ഗനിര്ദ്ദേശത്തിന് അംഗീകാരം നല്കി.
എല്ലാ ആര്ട്സ്, സയന്സ്, ടെക്നോളജി, കൊമേഴ്സ്, വിദ്യാഭ്യാസ വകുപ്പുകളിലും യുജിസി നിര്ദ്ദേശിച്ചിട്ടുള്ള നാഷണല് ഹയര് എഡ്യൂക്കേഷന് ക്വാളിഫിക്കേഷന്സ് ഫ്രെയിംവര്ക്ക് നടപ്പിലാക്കാന് കൗണ്സില് തീരുമാനിച്ചു. ഈ ചട്ടക്കൂടിന് കീഴില്, ബാച്ചിലേഴ്സ് പ്രോഗ്രാമുകള്ക്ക് 120 ക്രെഡിറ്റുകളും പോസ്റ്റ് ഗ്രാജുവേറ്റ് ഡിപ്ലോമകള്ക്ക് 40 ക്രെഡിറ്റുകളും എംഎ, എംകോം, എംഎസ്സി, മറ്റ് ബിരുദാനന്തര കോഴ്സുകള്ക്ക് 80 ക്രെഡിറ്റുകളും ഉണ്ടാവും.
വിസ കാലാവധി കഴിഞ്ഞാലും ഐസിസിആര് സ്കോളര്ഷിപ്പുകളില് ഉള്പ്പെടുന്ന പിഎച്ച്ഡി പ്രോഗ്രാമുകളില് ചേരുന്ന വിദേശ വിദ്യാര്ത്ഥികളെ നിരീക്ഷിക്കാന് വകുപ്പുകള്ക്ക് നിര്ദ്ദേശം നല്കി.
മംഗളൂരു സര്വകലാശാല ഈ വര്ഷവും ‘നാക്’ അക്രഡിറ്റേഷന് തേടും. വകുപ്പ് മേധാവികള്ക്ക് പുതുക്കിയ മാര്ഗ്ഗനിര്ദ്ദേശങ്ങള് നല്കുന്നതിനായി നാക് ഡയറക്ടര് ഡോ. കണ്ണന് സര്വകലാശാല സന്ദര്ശിക്കുമെന്ന് പ്രൊഫ. ധര്മ്മ പറഞ്ഞു.
