കണ്ണൂര്‍: കണ്ണൂര്‍ താവക്കരയിലെ ലോഡ്ജില്‍ പൊലീസ് നടത്തിയ റെയ്ഡില്‍ എം ഡി എം എയുമായി യുവതീയുവാക്കളെ അറസ്റ്റു ചെയ്തു. കണ്ണൂര്‍, തയ്യില്‍, മരക്കാര്‍ക്കണ്ടി, ചെറിയനാടി ഹൗസിലെ സി എച്ച് ആരിഫ് (41), മരക്കാര്‍ക്കണ്ടി പടിഞ്ഞാറെ വീട്ടില്‍ കെ അപര്‍ണ്ണ അനീഷ് (25) എന്നിവരെയാണ് കണ്ണൂര്‍ ടൗണ്‍ എസ് ഐ വി വി ദീപ്തിയും സംഘവം അറസ്റ്റു ചെയ്തത്. താവക്കരയിലെ സ്‌കൈ പാലസ് ഹോട്ടലിലെ 306-ാം നമ്പര്‍ മുറിയില്‍ തിങ്കളാഴ്ച വൈകിട്ട് നടത്തിയ പരിശോധനയിലാണ് ഇരുവരും അറസ്റ്റിലായത്. രഹസ്യവിവരത്തെ തുടര്‍ന്നാണ് എസ് ഐയും സംഘവും ലോഡ്ജില്‍ എത്തിയത്. പൊലീസെത്തുമ്പോള്‍ മുറി അകത്തു നിന്നും പൂട്ടിയ നിലയിലായിരുന്നു. മുട്ടിവിളിച്ചപ്പോള്‍ വാതില്‍ തുറന്നുവെങ്കിലും പൊലീസിനെ കണ്ടതോടെ അടക്കുവാന്‍ ശ്രമിച്ചു. എന്നാല്‍ പൊലീസ് സംഘം ബലം പ്രയോഗിച്ച് വാതില്‍ തള്ളിതുറന്നാണ് മുറിക്ക് അകത്ത് കടന്ന് ഇരുവരെയും കസ്റ്റിഡിയില്‍ എടുത്തത്. തുടര്‍ന്ന് നടത്തിയ പരിശോധനയില്‍ 2.94ഗ്രാം കഞ്ചാവും മയക്കുമരുന്ന് ഉപയോഗിക്കുന്നതിനുള്ള ഉപകരണങ്ങളും കണ്ടെടുത്തു.