കാസര്‍കോട്: ഫേസ്ബുക്ക് മെസഞ്ചര്‍ വഴി പരിചയപ്പെട്ട സംഘം യുവാവിന്റെ 19,36,000 രൂപ തട്ടിയെടുത്തതായി പരാതി. മുളിയാറിലെ കെ.ടി ഷിനോജ് കുമാറി (37)ന്റെ പരാതിയില്‍ കാസര്‍കോട് സൈബര്‍ ക്രൈം പൊലീസ് കേസെടുത്തു. 2025 ഫെബ്രുവരി 25 മുതല്‍ മെയ് 29 വരെയുള്ള ദിവസങ്ങളിലാണ് പണം തട്ടിയെടുത്തതെന്നു പരാതിയില്‍ പറഞ്ഞു. ഫേസ്ബുക്ക് മെസഞ്ചര്‍ വഴി പരിചയപ്പെട്ട സംഘം പ്ലസ് 500, ഗ്ലോബല്‍ സിഎസ് എന്ന കമ്പനിയുടെ ട്രേഡിംഗ് നടത്തിയാല്‍ നല്ല ലാഭം കിട്ടുമെന്ന് വിശ്വസിപ്പിച്ചാണ് പണം കൈക്കലാക്കിയതെന്നു പരാതിയില്‍ പറയുന്നു. വാട്‌സ്ആപ് വഴി ലിങ്ക് അയച്ചു കൊടുത്ത് ടെലഗ്രാം വഴി വിവരങ്ങള്‍ കൈമാറി പ്രതികളുടെ വിവിധ ബാങ്ക് അക്കൗണ്ടിലേക്ക് പണം അയച്ചു കൊടുക്കുകയായിരുന്നുവെന്നു പരാതിയില്‍ പറഞ്ഞു. പിന്നീടാണ് താന്‍ കബളിപ്പിക്കപ്പെട്ടതായി പരാതിക്കാരനു വ്യക്തമായത്.
സമാനരീതിയില്‍ 68,05000 രൂപ തട്ടിയെടുത്തുവെന്ന കേസില്‍ അമ്പലത്തറ പൊലീസും കേസെടുത്തു. പനയാല്‍, കരുവാക്കോട്ടെ അനീഷ് കുമാറിന്റെ ഭാര്യ പുല്ലൂര്‍, കുമ്പളയിലെ കെ. അഞ്ജലിയുടെ പരാതി പ്രകാരമാണ് കേസ്. പരാതിക്കാരിയുടെ ഭര്‍ത്താവില്‍ നിന്നു പല തവണയായാണ് പണം തട്ടിയതെന്നു പരാതിയില്‍ പറഞ്ഞു. തന്റെ സ്വര്‍ണ്ണം ഉള്‍പ്പെടെ പണയപ്പെടുത്തിയാണ് പണം നല്‍കിയതെന്നും പണം തിരികെ ലഭിക്കാതെ വന്നതോടെയാണ് പൊലീസിനെ സമീപിച്ചതെന്നും പരാതിയില്‍ പറഞ്ഞു.