കാസര്‍കോട്: അനധികൃതമായി മദ്യ വില്‍പ്പന നടത്തുന്നുണ്ടെന്ന വിവരമറിഞ്ഞ് ഹോട്ടലില്‍ പരിശോധനയ്‌ക്കെത്തിയ എക്‌സൈസ് ഉദ്യോഗസ്ഥരെ ആക്രമിച്ചുവെന്ന കേസിലെ പ്രതിക്ക് രണ്ടുവര്‍ഷം തടവും 20,000 രൂപ പിഴയും ശിക്ഷ. കുമ്പള, കോയിപ്പാടി, കുണ്ടങ്കാരടുക്കയിലെ കെ. പ്രഭാകര എന്ന അണ്ണി പ്രഭാകര (61)യെയാണ് ജില്ലാ അഡീഷണല്‍ സെഷന്‍സ് കോടതി (രണ്ട്) ജഡ്ജ് കെ. പ്രിയ ശിക്ഷിച്ചത്. 2021 ഏപ്രില്‍ രണ്ടിന് രാത്രി 8മണിക്കാണ് കേസിനാസ്പദമായ സംഭവം. കുണ്ടങ്കാരടുക്കയിലെ ജനത ഹോട്ടലില്‍ മദ്യവില്‍പ്പന നടക്കുന്നുണ്ടെന്ന വിവരത്തെ തുടര്‍ന്ന് പരിശോധനക്കെത്തിയ എക്‌സൈസ് ഉദ്യോഗസ്ഥരായ കെ. വിനോജ്, വി. ബാബുരാജ് എന്നിവരെ തൂക്കു പാത്രം കൊണ്ടു തലക്കു അടിക്കുകയും കൈയില്‍ കടിച്ചു പരിക്കേല്‍പ്പിക്കുകയും ചെയ്തുവെന്നാണ് കേസ്. കുമ്പള പൊലീസ് രജിസ്റ്റര്‍ ചെയ്ത കേസില്‍ പ്രതിയെ അറസ്റ്റു ചെയ്ത് അന്വേഷണം നടത്തി കോടതിയില്‍ കുറ്റപത്രം സമര്‍പ്പിച്ചത് കുമ്പള എസ്.ഐയായിരുന്ന എം. മനോജാണ്. പ്രോസിക്യൂഷനു വേണ്ടി അഡീഷണല്‍ ഗവ. പ്ലീഡര്‍ ജി. ചന്ദ്രമോഹന്‍, എം. ചിത്രകല എന്നിവര്‍ ഹാജരായി.