കാസര്‍കോട്: ഹൊസബെട്ടു കുണ്ടുകുടുക്ക ബീച്ചില്‍ തിരയില്‍പെട്ട് കാണാതായ ഗൃഹനാഥന്റെ മൃതദേഹം കണ്ടെത്തി. കടമ്പാര്‍ ബെജ്ജ റോഡിലെ ഭാസ്‌കര(56)ന്റെ മൃതദേഹമാണ് ഞായറാഴ്ച ഉച്ചയ്ക്ക് മൂന്നുമണിയോടെ കുമ്പള കോസ്റ്റല്‍ പൊലീസ് കുണ്ടുകുടുക്കയ്ക്ക് സമീപം കടലില്‍ കണ്ടെത്തിയത്. മൃതദേഹം മംഗല്‍പാടി താലൂക്ക് ആശുപത്രിയിലേക്ക് മാറ്റി. ശനിയാഴ്ച വൈകീട്ട് അഞ്ചരയോടെയാണ് ഭാസ്‌കരനെ തിരയില്‍പെട്ട് കാണാതായത്. ഭാര്യ മാലതിയും ബീച്ചില്‍ ഒപ്പം വന്നിരുന്നു. സ്‌കൂട്ടര്‍ കടല്‍ത്തീരത്തിന് സമീപം നിര്‍ത്തിയിട്ടത് കണ്ട് സംശയം തോന്നിയ നാട്ടുകാരാണ് കടപ്പുറത്ത് വീണുകിടക്കുന്ന മാലതിയെ കണ്ടത്. പിന്നീടാണ് ഒപ്പമുണ്ടായിരുന്ന ആളെയും കാണാതായ വിവരമെത്തുന്നത്. തുടര്‍ന്ന് മഞ്ചേശ്വരം പൊലീസും ഫയര്‍ഫോഴ്‌സും രാത്രി പത്തരവരെ കടലില്‍ തെരച്ചില്‍ നടത്തിയിരുന്നു.