കാസര്‍കോട്:മുന്‍ എംഎല്‍എ അടക്കമുള്ളവര്‍ കുറ്റക്കാരാണെന്ന് കണ്ടെത്തിയ പശ്ചാത്തലത്തില്‍ പിണറായി വിജയന്‍ സര്‍ക്കാര്‍ രാജിവെക്കണമെന്ന് രാജ്‌മോഹന്‍ ഉണ്ണിത്താന്‍ എംപി ആവശ്യപ്പെട്ടു. ഇരട്ടക്കൊലക്കേസിന്റെ വിധി അറിഞ്ഞശേഷം കല്യോട്ടെ രക്തസാക്ഷി മണ്ഡപത്തിലെത്തി പുഷ്പാര്‍ച്ചന നടത്തി സംസാരിക്കുകയായിരുന്നു അദ്ദേഹം. ഇപ്പോഴത്തെ വിധിയില്‍ പൂര്‍ണ്ണ സംതൃപ്തിയില്ല. പത്തു പ്രതികളെ വെറുതെ വിട്ട നടപടിക്കെതിരെ കോടതിയെ സമീപിക്കണോയെന്ന് പാര്‍ട്ടിയുമായി ആലോചിച്ചു തീരുമാനിക്കുമെന്നും ഉണ്ണിത്താന്‍ പറഞ്ഞു. ഉന്നത നേതാക്കളെ രക്ഷിക്കാന്‍ സുപ്രീം കോടതി വരെ പോയ പിണറായി സര്‍ക്കാരിന് അധികാരത്തില്‍ തുടരാന്‍ ധാര്‍മികമായി അവകാശമില്ലെന്ന് അദ്ദേഹം കൂട്ടിച്ചേര്‍ത്തു.