കണ്ണൂര്: പ്രധാനമന്ത്രിയുടെ ക്ഷണം സ്വീകരിച്ചു വിരുന്നില് പങ്കെടുത്ത ബിഷപ്പുമാര്ക്കെതിരെ മന്ത്രി സജി ചെറിയാന് പ്രസ്താവന നടത്തിയത് ക്രൈസ്തവ സമൂഹത്തെ വേദനിപ്പിച്ചുവെന്ന് തലശേരി അതിരൂപതാ ആര്ച്ച് ബിഷപ്പ് മാര് ജോസഫ് പാംപ്ലാനി പറഞ്ഞു. തലശേരി ബിഷപ്പ് ഹൗസില് മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം. സമീപകാലത്ത് ക്രൈസ്തവ സമൂഹത്തെ ഇത്ര അപമാനിച്ച പ്രസ്താവനയുണ്ടായില്ലെന്നും ആര്ച്ച് ബിഷപ്പ് പറഞ്ഞു. മന്ത്രിയുടെ വാക്കുകള് ക്രൈസ്തവ സമൂഹം ദു:ഖത്തോടെയാണ് കേട്ടത്. കേരളത്തിലെ ക്രൈസ്തവ സമൂഹത്തെ ഇത്ര കണ്ടു അപമാനിച്ച പ്രസ്താവന സമീപകാലത്ത് വേറെയാരും നടത്തിയിട്ടില്ല. ഏതാനും കാലങ്ങളായി കേരളത്തിലെ സഭയെ ബി.ജെ.പി പക്ഷത്താക്കാനുളള ബോധപൂര്വ്വമായ ശ്രമം ചില കമ്യൂണിസ്റ്റ് നേതാക്കളുടെ ഭാഗത്തുനിന്നുണ്ടാകുന്നുണ്ട്. നവകേരള സദസില് പങ്കെടുത്തതു മുഖ്യമന്ത്രി വിളിച്ചതു കൊണ്ടാണ്. അല്ലാതെ ഒരു രാഷ്ട്രീയ പാര്ട്ടിയുടെ നേതാവ് എന്ന നിലയിലല്ലോ ഞങ്ങള് പങ്കെടുക്കുന്നത്. ഏതെങ്കിലും ബിഷപ്പുമാര് പ്രധാനമന്ത്രിയുടെ ക്ഷണം സ്വീകരിച്ചു അദ്ദേഹത്തിന്റെ വസതിയില് ചെന്നെങ്കിലും അതും ഈയൊരു വിശാലവീക്ഷണത്തിലാണ്. അതിനെ മാത്രം കക്ഷി രാഷ്ട്രീയവല്ക്കരിക്കുന്നതു ശരിയല്ലെന്നും മാര് ജോസഫ് പാംപ്ലാനി പറഞ്ഞു.