കാലിഫോര്ണിയ: കാലിഫോര്ണിയയില് കാണാതായ ഇന്ത്യന് വിദ്യാര്ത്ഥിയെ ആറ് ദിവസങ്ങള്ക്ക് ശേഷം മരിച്ച നിലയില് കണ്ടെത്തി. കര്ണാടക സ്വദേശിയും കാലിഫോര്ണിയ ബെര്ക്ക്ലി സര്വകലാശാലയില് കെമിക്കല് ആന്ഡ് ബയോമോളിക്യുലാര് എഞ്ചിനീയറിംഗില് ബിരുദാനന്തര ബിരുദ വിദ്യാര്ത്ഥിയുമായ സാകേത് ശ്രീനിവാസയ്യയെ ആണ് മരിച്ചനിലയില് കണ്ടെത്തിയത്. ഫെബ്രുവരി ഒമ്പതിനാണ് സാകേതിനെ കാണാതായത്്.
പൊലീസ് മൃതദേഹം കണ്ടെടുത്തതായി സാന് ഫ്രാന്സിസ്കോയിലെ ഇന്ത്യന് കോണ്സുലേറ്റ് സ്ഥിരീകരിച്ചു. മൃതദേഹം ഇന്ത്യയിലേക്ക് കൊണ്ടുപോകുന്നതിന് ആവശ്യമായ എല്ലാ സഹായവും ഇന്ത്യന് കോണ്സുലേറ്റ് ഉറപ്പുനല്കി.
സാകേതിനെ കാണാനില്ലെന്ന വിവരം മറ്റ് വിദ്യാര്ത്ഥികളാണ് അധികൃതരെ അറിയിച്ചത്. സുഹൃത്തിനെ കണ്ടെത്താന് സഹായം അഭ്യര്ഥിച്ച് ലിങ്ക്ഡ്ഇനില് പോസ്റ്റ് ചെയ്തതോടെയാണ് കാണാതായ വിവരം പുറത്ത് വരുന്നത്. അന്സ തടാകത്തിന് സമീപമാണ് സാകേതിനെ അവസാനമായി കണ്ടത്. ഇവിടെ നിന്ന് സാകേതിന്റെ ലാപ് ടോപ്പും ബാഗും കണ്ടെത്തിയിരുന്നു. 2025 ല് ഐഐടി മദ്രാസില് നിന്ന് കെമിക്കല് എഞ്ചിനീയറിംഗില് ബിടെക് ബിരുദം നേടി. ബെംഗളൂരുവിലെ ശ്രീ വാണി വിദ്യാഭ്യാസ കേന്ദ്രത്തിലാണ് സാകേത് പഠിച്ചത്.
