തൃശൂര്: ഓണ്ലൈനില് ഓര്ഡര് ചെയ്ത പടക്കത്തിന്റെ പാഴ്സലുമായി സഞ്ചരിച്ച ലോറി തീപിടിച്ച് പൊട്ടിത്തെറിച്ചു. തൃശൂര് നടത്തറ ദേശീയപാതയില് ഉച്ചയ്ക്കാണ് സംഭവം. ലോറിയിലുണ്ടായിരുന്ന പാഴ്സല് പായ്ക്കറ്റുകള് മറ്റൊരു വാഹനത്തിലേക്ക് മാറ്റുന്നതിനിടെ തീപിടിക്കുകയായിരുന്നു എന്ന് പറയുന്നു. പടക്കമാണെന്ന് പറയാതെയാണ് പാഴ്സല് അയച്ചത്, ഇത് നിയമ വിരുദ്ധമാണെന്ന് ജീവനക്കാര് പറയുന്നു.
ലോറിയിലുണ്ടായിരുന്ന ജീവനക്കാര് പരിക്കേല്ക്കാതെ രക്ഷപ്പെട്ടു. ലോറിക്ക് തീപിടിച്ചതിനെ തുടര്ന്ന് ദേശീയപാതയില് അര മണിക്കൂര് ഗതാഗതം തടസപ്പെട്ടു. രണ്ട് യൂണിറ്റ് അഗ്നിരക്ഷാ സേനയെത്തിയാണ് തീയണച്ചത്.
