കാസര്‍കോട്: ടാറിംഗിനു ശേഷം റോഡരുകില്‍ ഉപേക്ഷിച്ച ടാര്‍ വീപ്പയില്‍ വീണ്, ജീവനുമായി മല്ലിട്ട നായക്കുട്ടികളുടെ ജീവന്‍ രക്ഷിച്ച് കാസര്‍കോട് ഫയര്‍ഫോഴ്‌സ്. വ്യാഴാഴ്ച ഉച്ചയ്ക്ക് മാവിക്കട്ട റോഡിലെ ചൂരിപ്പള്ളത്താണ് ഹൃദയഭേദകമായ സംഭവം ഉണ്ടായത്. റോഡരുകില്‍ നിന്നു പട്ടിക്കുട്ടികള്‍ നിര്‍ത്താതെ കരയുന്നത് കേട്ടാണ് പരിസരവാസിയായ രാജേഷ് ലോബേ എന്നയാള്‍ സ്ഥലത്തെത്തിയത്. കടുത്ത വെയിലില്‍ ഉരുകിയൊലിക്കുന്ന ടാറില്‍ നിന്നു രക്ഷപ്പെടാന്‍ കഴിയാതെ പട്ടിക്കുട്ടികള്‍ ജീവനുമായി മല്ലിടുന്ന കാഴ്ച്ചയാണ് അദ്ദേഹം കണ്ടത്. പട്ടിക്കുട്ടികളെ പുറത്തെടുക്കാന്‍ ശ്രമിച്ചുവെങ്കിലും ഫലം ഉണ്ടായില്ല. തുടര്‍ന്ന് ഫയര്‍ഫോഴ്‌സിനെ വിവരം അറിയിക്കുകയായിരുന്നു. തുടര്‍ന്ന് സീനിയര്‍ ഫയര്‍ആന്റ് റെസ്‌ക്യു ഓഫീസര്‍ ബി സുകുവിന്റെ നേതൃത്വത്തില്‍ പൊലീസ് സ്ഥലത്തെത്തി. മണ്ണെണ്ണയും ഡീസലും ഉപയോഗിച്ചും വീപ്പ വെട്ടിപ്പൊളിച്ചും പട്ടിക്കുട്ടികളെ ഓരോന്നായി പുറത്തെടുത്തു. ദേഹത്ത് പറ്റിയിരുന്ന ടാര്‍ പൂര്‍ണ്ണമായും നീക്കം ചെയ്ത ശേഷമാണ് പട്ടിക്കുട്ടികളെ സ്വതന്ത്രരായി വിട്ടത്.
ഫയര്‍ഫോഴ്‌സ് സംഘത്തില്‍ രാജേഷ് പാവൂര്‍, ഷൈജു, ഹോംഗാര്‍ഡ് രാജു എന്നിവരും ഉണ്ടായിരുന്നു.